Vüsal Məmmədov: “Amma ölümün pəncəsindən xilas etdiyim o qədər adam var idi ki, heç biri səsini çıxarmadı”.

Sabirabad rayon Perinetal Mərkəzin direktoru ginekoloq-cərrah Vüsal Məmmədovla pasiyentin arasında gedən dialoqun videogörüntüsü bir anda ölkə mətbuatının gündəminə çevrildi. Hamı Vüsal həkimi rüşvətxorluqda ittiham etdi. Əlində xəstə öldürən bacarıqsız həkimlərə əhəmiyyət verməyən Səhiyyə Nazirliyi bu dəfə çox çevik tərpəndi və V.Məmmədovu əlüstü işdən azad etdi.

Lakin xəstəxanadan saytımıza zəng edən bir həkim, əslində, bu ssenarinin digər həkim tərəfindən qurulduğunu bildirdi. Adının çəkilməsini istəməyən həkim onu da dedi ki, məqsəd Vüsal həkimi o xəstəxanadan uzaqlaşdırmaq olub. Bəs səbəb nə olub?

V.Məmmədov adıçəkilən videoda pasiyentindən qeysəriyyə əməliyyatı üçün pul istəyir və söhbət zamanı bəlli olur ki, dövlət xəstəxanalarında hər şey pulsuzdur desələr də, əslində, həkim hər şeyi pulla alası olur. O, hətta əməliyyat zamanı işlənəcək sapların da birinin beş manata alındığını deyir: “Üç sap işlənəcək, sapın biri beş manatdır”. Hanı, bəs dövlət xəstəxanalarında hər şey pulsuz idi? Bu sualı Səhiyyə Nazirliyinə ünvanlayan tapılmadı. Nədənsə, bütün media təmsilçiləri, sanki Avropanın ən sivil ölkəsində yaşayırmış və ömründə rüşvət görməyibmiş kimi həkimin üstünə hücuma keçdi. Amma bu həkimin ayda nə qədər maaş aldığını soruşan tapılmadı.

Vüsal Məmmədov 1983-cü ildə Bakı şəhərində anadan olub. 6 il Tibb Universitetində təhsil alıb. Daha sonra Sankt-Peterburqda ali təhsilini (ordinatura-aspirantura) davam etdirib. Sankt-Peterburqda ginekoloq kimi fəaliyyət göstərib. Səhiyyə Nazirliyinin göstərişi ilə 2011-ci ildə Sabirabadda işləməyə başlayıb.

11 il ali təhsil alan baş həkim bu gün 170 manat maaş alır. Ailəlidir, bir övladı var və Sabirabadda kirayədə yaşayır. Gəlin, baxaq görək, 22 illik təhsildən sonra aldığı 170 manat maaşla bu həkim hansı maddi ehtiyacını ödəyə bilər?

Nəyə görə özəl klinikalar pasiyentə istədiyi məbləği “oxuyur”, amma dövlət klinikalarında həkim 170 manat maaşa baxır. Özəl klinikalarda doğuşun qiymətinə nəzər salaq.

Özəl klinikalarda qeysəriyyə ilə doğuşun qiyməti 1000 manatdan başlayır. Məsələn, Leyla Şıxlinskaya adına klinikada təbii doğuş 1800 manat, qeysəriyyə ilə 2200 manata başa gəlir. Funda Tibb Mərkəzində isə qeysəriyyə kəsiyi ilə doğuş 800 manata başa gəlir. Amma analizlər bu pula daxil deyil. Ayrıca analizlər üçün 50 manat ödəmək gərəkdir.

Kəbirə Məmmədova Klinikasında isə qeysəriyyə ilə doğuş 850 manata başa gəlir. Bu qiymətə hepatitlərin analizi, uşağa 3 gün ərzində vurulacaq 3 peyvənd, qanın ümumi analizi və sidik analizi daxildir.

Bunu da hamı yaxşı bilir ki, bu gün özəl klinikalara işə düzəlmək üçün böyük məbləğdə rüşvət verməli olursan.

Vüsal Məmmədov kimi kadrlar bu gün barmaqla sayılacaq qədərdir. Bu gün paytaxtda belə güclü mütəxəssislərə ehtiyac var. Bölgələrdə isə vəziyyət daha da ağırdır. V.Məmmədovun pasiyenti olan Nigar Hacıyeva deyir ki, vəziyyəti ağır olduğuna görə onu heç bir xəstəxana qəbul etməyib: “Vüsal həkim haqqında eşitmişdik. Gəldik, sağ olsun bizi çox yaxşı qarşıladı, nəzarətə götürdü. İndi onu qovublar, biz də normal həkim tapa bilmirik”.

Ötən gün İnterpress.az-saytı həkimi axtarıb tapdı. Depresiyada olan həkimdə insanlara qarşı yaranmış inamsızlığın şahidi olduq: “İnanıram ki, bir gün haqq-ədalət yerini tutacaq. Amma mənə pis təsir edən o oldu ki, işlədiyim müddətdə o qədər adamları ölümün pəncəsindən xilas etmişəm. Bir qəpik də pul almamışam. Amma o adamların heç biri bu gün səsini çıxarmadı”.(interpress.az)