41 saylı Sumqayıt Birinci Seçki Dairəsindən deputatlığa namizədi Həcər Abbaslının seçki qərargahından Xeberle.com-a həmin dairədən digər namizəd olan Yeni Azərbaycan Partiyasının üzvü, "Azərsutəchizat tikinti” ASC-nin sədri Mirzəcan Xəlilovun qanunsuz əməllərlə məşğul olduğu barədə şikayət daxil olub Seçki qərargahından redaksiyamıza göndərilən məktubu olduğu kimi təqdim edirik:
"41 saylı Sumqayıt I seçki dairəsində qanunazidd hadisələr baş verir. Belə ki, 41 saylı Sumqayıt I Seçki Dairəsindən Milli Məclisə namizədliyini öz təşəbbüsü ilə irəli sürmüş M.Xəlilov nüfuzlu nümayəndələrinin adını çəkərək seçiciləri "kimə səs verilməsindən asılı olmayaraq qutudan çıxacağına” inandırmağa çalışır, bununla vətəndaşların namizədlər arasında sərbəst seçim etməsinə qarşı psixoloji basqı gerçəkləşdirir, səsvermə günü Yeni Azərbaycan Partiyasının üzvlərinin, yerli məmurların və bələdiyyə orqanlarının "yuxarıların tapşırığı” ilə onun lehinə çalışacağını bəyan edir. Mirzəcan Xəlilovun adamlarının yaydığı bu cür informasiyaların nəticəsidir ki, onun adı "artıq təyin edilmiş deputat” kimi çəkilir.

Həmçinin M.Xəlilov dövlət işçilərini özünə vəkil təyin edərək, dövlət büdcəsindən məvacib almalarına baxmayaraq iş günündə və iş saatlarında öz təşviqatına cəlb edir. Bu nüans vəzifə və xidməti mövqedən üstünlük əldə etmək məqsədi ilə istifadə olunması nəticəsində bərabərlik prinsiplərinin pozulması halı yaradaraq Seçki Məcəlləsinin 69.4, habelə 55.2-ci maddəsinin kobud surətdə pozulmasıdır. Yaranmış hal Seçki Məcəlləsinin 71.1.1 bəndində əks olunan qeydə alınmış digər namizədlərin seçki kampaniyası zamanı öz siyasi ideyalarını və baxışlarını azad və sərbəst yaymaq hüququna hörmət bəsləmək şərtini də pozur. Bütün bunlar "Azərsutəchizat tikinti” ASC-yə rəhbərlik edən bir şəxsin qanunlardan və insan hüquqlarından xəbərsizliyinin ən bariz nümunəsidir.

Ümid edirəm ki, aidiyyatı qurumlar onun bu qanunsuz əməlləri barəsində müvafiq ölçü götürəcəklər.”

Xeberle.com olaraq qarşı tərəfin də mövqeyini işıqlandırmağa hazırıq.