Masazır qəsəbəsinə işləyən 215 saylı marşrutdakı özbaşınalıqlar bitmək bilmir. Az qala hər gün Nəqliyyat Nazirliyinin özbaşınalıqları, onun başqanı Ziya Məmmədov barədə mətbuatda xoş olmayan müxtəlif xəbərlər yayılır. Ancaq çi fayda…

Artıq insanların böyük kəsimində bu quruma və onun başçısına qarşı bir aqressiya formalaşıb. Az qala hər məsələdə narazılıqlar yaradan nazirlik ictimai nəqliyyat sektorunda tamamilə yarıtmaz fəaliyyət göstərir. Bir neçə dəfə sübuta yetirilən bu problem indi də Masazır qəsəbəsi sakinlərinin ömrünü çürüdür. Belə ki, qəsəbə sakinləri bu sahədəki problemləri ilə bağlı Xeberle.com-un poçt ünvanına məktub göndəriblər.

 Qəsəbə sakinlərinin məktubu:

Qəsəbəyə Memar Əcəmi metrostansiyasından yeganə “215” saylı marşrut işləyir. Bu başıbəlalı marşrut haqqında bir neçə dəfə də şikayətlər edilib, mətbuatda yazılıb. Amma xeyri yoxdur. Yolu “215”-dən düşən hər kəs artıq cana gəlib. Hər gün onlarla sakin yollarda qalır, işə gecikir. Çünki avtobus o qədər dolur ki, minmək qeyri-mümkün olur. Problemin mahiyyəti isə belədir: Masazırda “Yeni Bakı” yşayış kompleksində sonuncu stansiyadan çıxan “215” saylı avtobuslar əvvəlcə həmin qəsəbədə yerləşən “Zəngilan” şəhərciyinə gedir, oranın camaatını yığandan sonra yenidən “Yeni Bakıya” qayıdır. Təbii ki, artıq avtobus dolmuş olur. “Yeni Bakı”dan sonra “Qurtuluş” yaşayış sahəsinin sakinləri eyni problemlə üzləşir. Dolu gələn avtobusa minə bilmirlər. Nəticədə hər gün səhər və axşam həmin avtobuslarda nalayiq ifadələr işlədilir və sürücü sərnişin-konflikti pik həddə çatır. Sürücülər özləri də bezib. Soruşanda ki, niyə düzgün işləmirsiz, deyirlər ki, “qarajdan maşın vermirlər. Bizlik bir şey yoxdur. Biz özümüz də istəmərik belə olsun…”.

Sakinlər bildirir ki, 215 saylı marşrutla əlaqədar bu vəziyyət daha öncə də olmuşdu. Şikayətlərdən sonra bir ara düzəldi. Sonradan yenə həmin vəziyyət yarandı. Sakinlərin dediyinə görə “215” saylı avtobusların elə bil yiyəsi yoxdur. Sürücülər istədikləri vaxt gəlib-gedirlər, intervalları çoxdur, bəzən yarım saatdan bir gəlirlər. Həm də bu avtobuslar hər dəfə insanlarla dolmuş halda yanacaqdoldurma məntəqəsinə daxil olur. Sərnişinlər etiraz etsələr də heç bir fayda olmur. Sürücülər öz bildiklərini edirlər.

Xatırladaq ki, Masazır qəsəbəsində 760 məcburi köçkün ailəsi üçün “Zəngilan Şəhərciyi”də yeni binalar tikilib. Ancaq qəsəbə sakinləri şəhərdəki iş yerlərinə gedə bilmək üçün marşurt tapa bilmirdilər. Bir müddət sonra şəhərciyə 203 nömrəli marşurt avtobusu ayrılmışdı. Beləcə, sakinlər rahat işə gedib gələ bilirdilər. Ancaq indi… Qəsəbə sakinləri deyir ki, heç bir ay keçməmiş onlara ayrılan 203 saylı marşurt qapadılaraq 215 saylı marşurtla birləşdirilib.

Nazirliyin nəzdində olan Dövlət Avtomobil Nəqliyyat Xidməti də eyni iş prinsipi ilə “işləyir”. Maraqlıdır, bu qurumlar vətəndaşlara xidmət etmirsə, bəs kimlərə xidmət edir?

Tam məsuliyyətlə deyirik ki, bu nazirlik vətəndaşları ən çox incidən qurumdur. Sual olunur, niyə dinc əhalini dövlətdən, dovlətin qurumundan narazı salırsınız? Amalınız nədir?

Nazirliyin də mövqeyini işıqlandırmağa hazırıq. Ümid edək ki, “215” saylı avtobusların yiyəsi tapılacaq, əks təqdirdə vətəndaşlar özləri gərəkli sözünü deyəcək!