Bayraq dövlətin varlığını təsdiqləyən, milləti ucaldan, hər bir vətəndaşı qürurlandıran rəmzdir. Azərbaycanda Dövlət Bayrağı Gününün təsis olunması və hər il təntənə ilə keçirilməsi məhz bu mənəvi dəyərdən qaynaqlanır.

 Hüseyn Ərəblinski adına Sumqayıt Dövlət Dram Teatrında Dövlət Bayrağı Günü münasibətilə ümumşəhər tədbiri keçirilib.

Əvvəlcə tədbir iştirakçıları teatrın foyesində gənc rəssamların bayrama həsr etdiyi işləri ilə tanış olublar.

Bayram tədbirində Sumqayıt Şəhər İcra Hakimiyyətinin başçısı Zakir Fərəcov, Milli Məclisin deputatları və digər rəsmi şəxslər də iştirak ediblər.

Tədbirdə qeyd olunub ki, Dövlət Bayrağı millətimizin, xalqımızın azadlıq və istiqlal ideallarının, milli varlığının, bəşər sivilizasiyasında qədim və çağdaş mədəniyyətə sahib olduğunun təcəssümüdür. Üçrəngli, ay-ulduzlu bayrağımız hər bir ölkə vətəndaşının inam və güvənc yeridir. Çıxışlarda əminliklə vurğulandı ki, tezliklə zəfər bayrağımız Şuşada, Ağdamda, Kəlbəcərdə və işğal altında olan digər torpaqlarımızda dalğalanacaq.

Sonra ədəbi-bədii kompozisiya nümayiş olunub. Kompozisiya xalq şairi Bəxtiyar Vahabzadənin bu misraları ilə adlandırılıb:

"Bayraq mənliyimdir, bayraq kimliyim,

Bayraq – öz yurduma öz hakimliyim”.

Bayram tədbirində respublikanın tanınmış incəsənət ustalarının ifasında Vətənimizə, doğma Azərbaycanımıza həsr olunan musiqilər ifa olunub, biri-birindən maraqlı şeirlər səsləndirilib.
AZƏRTAC