"Azərbaycanda nikahı rəsmiləşdirərkən tibbi müayinədən keçən zaman QİÇS xəstəliyi aşkarlanan 45 nəfərin 7-i əvvəldən qeyri-rəsmi ailəli olub". Bunu  açıqlamasında Respublika QİCS-lə Mübarizə Mərkəzinin Epidemioloji Nəzarət və Profilaktika şöbəsinin müdiri Afət Nəzərli deyib.

O bildirib ki, 7 cütlüyün hər birində QİÇS aşkarlanıb. Eyni zamanda onların arasında övladında QİÇS tapılan cütlük də olub: "Onlardan yalnız birinin övladında QİÇS analizi müsbət çıxıb. Amma məlum olub ki, həmin uşaq qadının birinci qeyri-rəsmi nikahından dünyaya gəlib”.

A. Nəzərli qeyd edib ki, QİÇS aşkarlanan 45 nəfərdən 11-i qadındır: "O qadınlardan 3-ü Rusiya Federasiyası vətəndaşıdır. Onlar bura rəsmi nikah qurmaq üçün gəlsələr də, tibbi müayinə zamanı QİÇS aşkarlanıb. Ümumiyyətlə, nikaha görə tibbi müayinə zamanı QİÇS aşkarlananların əksəriyyəti Rusiya Federasiyasında işləyənlərdir. Onların çoxu Azərbaycan vətəndaşları olsa da, uzun müddətdir Rusiyada çalışırlar. Azərbaycana isə nikaha daxil olmaq üçün gəlsələr də, qanlarında QİÇS virusu tapıldığından Rusiyaya geri qayıdıblar”.

Qeyd edək ki, "Ailə Məcəlləsində dəyişikliklərin edilməsi haqqında" qanunun tətbiqi ilə bağlı bəzi normativ hüquqi aktları təsdiq ilə əlaqədar, 1 iyun 2015-ci il tarixindən etibarən nikaha daxil olmaq istəyən vətəndaşlar mütləq tibbi müayinədən keçməlidirlər. Nazirlər Kabineti tərəfindən nikaha daxil olmaq istəyən şəxslərin tibbi müayinədən keçmə qaydaları təsdiqlənib, tibbi müayinə olunmalı xəstəliklərin siyahısı müəyyənləşdirilib. Bu məqsədlə səhiyyə müəssisələrində zəruri şərait yaradılıb. Tibbi müayinə və məsləhətlər nikaha daxil olmaq istəyən şəxslərin və ya onlardan birinin yaşayış yeri üzrə Səhiyyə Nazirliyi tərəfindən müəyyən edilmiş dövlət tibb müəssisəsində həyata keçirilir. Tibbi müayinənin keçirilməsi və məsləhətlərin verilməsi pulsuz aparılır.(Lent.az)