Sumqayıtda yerləşən N hərbi hissəsində 369 gənc əsgər Vətənə sədaqət andı içib.

Mərasimdən əvvəl Vətənin azadlığı və suverenliyi uğrunda həlak olan şəhidlərin və ümümilli lider Heydər Əliyevin xatirəsi bir dəqiqəlik sükutla yad edilib.

Dövlət Himni ifa olunduqdan sonra müdafiə naziri, general-polkovnik Zakir Həsənovun hərbi hissənin şəxsi heyətinə təbrik məktubu oxunub. Hərbi hissənin döyüş bayrağı meydana gətirilib və gənc əsgərlərin təntənəli hərbi keçid və andiçməsi olub.

Mərasimdə çıxış edən korpus komandiri, polkovnik İlqar Lətifov, hərbi hissənin komandiri Qurban Qurbanov, valideynlər və ictimaiyyət nümayəndələri gənc əsgərlərə nümunəvi, nizam-intizamla xidmət etməyi, silah və texnikanın sirlərini dərindən öyrənərək döyüş qabiliyyətlərini artırmağı tövsiyə ediblər. Gənc əsgərləri işğal altındakı torpaqlarımızın azad edilməsi uğrunda döyüşə hər an hazır olmağa və hərb işinə mükəmməl yiyələnməyə çağırıblar.

Gənc əsgərlər adından çıxış edən Bəxtiyar Hacızadə onlara göstərilən etimadı layiqincə doğruldacaqlarını, hərbi biliklərə səylə yiyələnəcəklərini, Vətənə və xalqa sədaqətlə xidmət edəcəkərini bildirib.

Hərbi hissənin komandiri andiçmə mərasiminin başa çatması barədə raport verdikdən sonra iştirakçılara konsert proqramı təqdim olunub, valideynlər övladları ilə görüşüblər.