Sumqayıtın 17-ci mikrorayon sakinləri dayanacaq problemindən əziyyət çəkir. Samir Hüseynov adlı mikrorayon sakini Xeberle.com saytının elektron ünvanına göndərdiyi şikayət məktubunda qeyd edir ki, yaşadığı mikrorayonda dayanacaq problemi var: "Mikrorayonun heç bir yerində dayanacaq yoxdur. Səhərlər işə gedəndə durmağa yer tapmırıq. Yağış-qarda isə vəziyyət çox acınacaqlı olur. Bir dəfə Sumqayıt şəhər İcra hakimiyyətinin rəsmisi Tariyel müəllimə yaxınlaşıb bu problemi onun nəzərinə çatdırdım. Mənə diqqətlə qulaq asdıqdan sonra heç bir söz deməyərək çıxıb getdi. Mənim kimi yüzlərlə fəhlə hər gün işə gedir. Sığınmağa yer tapmırıq. Ümumiyyətlə 17-ci mikrorayonun dörd bir tərəfində bir dənə də olsun dayanacaq yoxdur. Əsasən də restoranların qarşısında. "İrəvan” restoranından başlamış "Səda” marketə qədər olan hissədə- nə yolun 16-cı mikrorayona olan tərəfində, nə də ki, 17-ci mikrorayon olan ərazidə dayanacaq quraşdırılmayıb. Yağış yağanda ağacların altında, maşınların yanında, marketlerin kənarına söykənirik. Aidiyyatı qurumların bu problemi aradan qaldırmalarını xahiş edirik.”

Xeberle.com olaraq ümidvarıq ki, məktubda qeyd olunan problemin həlli istiqamətində müvafiq qurumlar lazımi addımlar atacaq.