Yenə qış gəldi qonaq,
Yenə bumbuzdur otaq,
Yenə yanmır bir ocaq,
Deyirlər qar yağacaq.

Son zamanlar tez-tez zümzümə edirəm bu misraları... Çünki havaların soyuq keçməsi canıma üşütmə salıb, çox güman ki, elə sizlərin də.

Bəli, qış çathaçatdadır. Bizim – sumqayıtlıların isə qışa dayanmaq üçün istilik adlı kommunal problemimiz hələ də öz həllini tapmayıb. Sabiq icra başçısı Eldar Əzizovun məlum hesabat-toplantılarında bu məsələ daim səsləndirilsə, hətta istilik təchizatı idarəsinin rəisi danlansa da, bir nəticə hasil olmadı. Yalnız şəhərin bir neçə mikrorayon və məhəlləsinin sakinləri "otopleniya” səadətinə çatdılar. Geridə qalanlar isə öz daxili imkanları hesabına qışın soyuqlarına sinə gərdi. Bax, elə Qəribi burdaca ağlamaq tutur.

Daxili hesab dedikdə, yəni sakinlərin öz ciblərinin puluna mənzillərinə istilik sistemləri çəkməsi nəzərdə tutulur ki, bu da hər sakinin cibi üçün deyil. Belə ki, xalq arasında "kombi” kimi məşhur olan istilik sistemlərinin satış qiyməti çox bahadır. İstehsalçı firmalara və keyfiyyətlərinə görə istilik sistemlərinin qiymətləri 700–2500 manat civarında dəyişir. Quraşdırılması isə bir ayrı zırıltıdır.

İndi gəlin reallıqdan danışaq. Bu qiymətlərə şəhər sakinlərinin hamısının mənzillərinə istilik sistemi quraşdıra bilməsi ağlabatan deyil. Demək belə çıxır ki, kimin pulu var qış ona qorxulu deyil, kimin ki, buna gücü çatmadı, onda soyuqdəyməyə qarşı mürəbbə-dərman ehtiyatını görsün ki, soyuq mənzillərində xəstələnəndə başlarına bir çarə edə bilsinlər. Tamamilə doğru deyirsiz, heç kimin evi soyuq olmur. Hərə bir yolla mənzilini qızdırır. Hə, Qəribi ikinci dəfə ağlamaq tutur.

Çarə qalır elektrik qızdırıcılarına ki, bu zaman "Azərişıq” başlayır çırtıq çalıb oynamağa. Çünki elektrik qızdırıcılarının sərf etdiyi enerjinin məbləği soyuq aylarda 30 manatdan aşağı düşmür. Məsələ orasındadır ki, istilik sistemi quraşdırmış sakinlərin aylıq qaz sərfiyyatına xərclədikləri məbləğin aşağı miqdarı təxminən bu civardadır. Halbuki, soyuq aylarda dövlət tərəfindən istiliklə təmin olunmuş sakinlərin ümumi kommunal xərcləri bu məbləğdə olur.

Keçək əsas məsələyə, "no oçen vajnı” məsələyə. Görəsən Sumqayıt qışa hazırdırmı? Məmurların sənəd-sünədlərinə görə bəli. Amma reallıq tam əksini deyir. Dəfələrlə tənqid olunmasına baxmayaraq, "Sumqayıtistiliktəchizat” idarəsinin yarıtmaz işi göz önündədir. 2014-cü il dekabrında qurumun rəisi Aftandil Nuriyev mətbuata açıqlamasında bildirmişdi ki, "Regionların sosial-iqtisadi inkişafı dövlət proqramı”ına görə 2005-ci ildə 2018-ci ilədək Sumqayıt şəhərinin istiliklə təchiz olunması başa çatdırılacaq. Təxminən bir il bundan əvvəl verilən hesabatda o da qeyd olunmuşdu ki, Sumqayıtda 4 mikrorayon və 6 məhəllə istiliklə təchiz olunub. Qurum rəsmisinin sözlərinə görə 215 bina, 30 orta məktəb, 14 uşaq bağçası, 14 səhiyyə obyekti istiliklə təchiz olunub. Üst üstə gəlsək, edər 273 bina. 10 il ərzində bu qədər iş görülübsə, növbəti qalan 3 il ərzində "Sumqayıtistiliktəchizat”ın xarüqələr yaradacağı şübhə altındadır. Nəzərə alaq ki, Sumqayıt respublikanın üçüncü böyük şəhəridir və əhalisi artıq yarım milyona çatır. Belə bir şəhərdə Aftandil müəllimin 1005 abonentinin olması da gülməlidir.