Bu gün  Azərbaycanda səhiyyə işçilərinin peşə bayramının qeyd olunduğu gündür. Bu gün tək həkimlərin deyil, mənə gӧrə, bütün insanlarımızın bayramı olmalıdır. Sağlamlıq dünyanın heç bir var-dӧvlətiylə əldə edilə bilmir. Amma həkimlərimiz sağlamlığımızın keşiyində duran çox müqəddəs bir peşənin sahibidirlər. Bu müqəddəs peşəni hər kəsin mənimsədiyi kimi həyata keçirdiyini bilirik. Kimisi, sadəcə həkiməm deməklə, kimisi isə vicdanını ortaya qoyaraq bu peşənin arxasınca getməkdədir.

Bu yazımda sadəcə ikincilərdən sӧhbət açmaq istəyirəm. Peşəsinə qazanc mənbəyi olaraq baxmayan sӧzün həqiqi mənasında Hippokrat andına sadiq qalan loğmanlarımızdan yazmaq istəyirəm. Əməkhaqları nə qədər az olsa da, pul qazanmaq naminə xəstələrinə “FİRMA” dərmanları yazmayan, gӧzləri xəstələrin cibində olmayan, həkimlərimizdən yazmaq istəyirəm. Yanına gələn xəstənin geydiyi paltarların markasına gӧrə fərq qoymayan həkimlərdən yazmaq istəyirəm. Bir sӧzlə, xəstəsinə doğması kimi yanaşan həkimlərdən yazmaq istəyirəm.

Bu cümlələri oxuyub, ironiya ilə gülümsəyənlərin olacağını da bilirəm. Onların bəs o zaman bu qədər uşaq, ana olümləri, xəstələrimizin İrana, Türkiyəyə və digər xarici ӧlkələrə axın etməsinin səbəbi nədir deyə sual edəcəklərini də bilirəm. Onlar da haqlıdırlar. Bütün bunların olduğunu kimsə inkar edə bilməz. Nə yazıq ki, vicdanını tərəziyə qoyan həkimciklər də var. Məhz belə həkimciklərin yarıtmaz fəaliyyətləri üzündəndir ki, vətəndaşlarımızın arasında Azərbaycan səhiyyəsinə olan inam hissi azalıb.

Ancaq, bu, heç də o demək deyil ki, Azərbaycanımızda olan həkim ordusu savadsızlardan ibarətdir. Əsla belə deyil. Axı həqiqətən də Azərbaycanda kifayət qədər savadlı, vicdanlı, qayğıkeş, gülərüz həkimlərimiz çoxdur. Elə yaşadığım Sumqayıt şəhərində də çoxsaylı həkimlər var ki, onlara sӧzün əsl mənasında ӧz sağlamlığımızı etibar edə bilərik. Belə həkimlərin arasında yaşlı nəsillə yanaşı, gənc nəslin nümayəndələrinin də çoxluq təşkil etməsi vətəndaşlarımızın gələcəyə olan ümidini artırır.

Xəstələri üçün həyacan dolu anlar yaşayan həkimlərimizdən bir neçəsinin adını çəkməklə elə bilirəm ki, az da olsa, onların əməklərinə dəyər vermiş olaram. Belə həkimlərin arasında xüsusən 1 saylı Sumqayıt şəhər xəstəxanasının həkimi, uroloq Maqsud Adıyev, Yoluxucu xəstəliklər şӧbəsinin həkimi Aytən xanım Abdullayeva, həmin xəstəxananın nevrologiya şӧbəsinin həkimi Vəfa xanım Gəncəliyeva, Sumqayıt uşaq xəstəxanasının həkimi Səbinə xanım Qurbanovanın və sair loğmanlarımızın adını xüsusi qeyd etmək yerinə düşər. Çünki adını sadaladığım peşə sahibləri hər biri ayrı-ayrılıqda, vicdanını “Firma” dərmanlarına satan, insan taleyi ilə oynayan həkimciklərdən fərqli olaraq, ӧz peşəkarlıqları, xəstələrə yanaşma tərzləri ilə həqiqətən də yer üzündə Allahın “şəfaverici əli” olduqlarını təsdiqləyən müqəddəs insanlardır.

Elə bu prizmadan yanaşaraq adlarını sadaladığım həkimlərin simasında xəstələri üçün narahatlıq hissi keçirən, onların sağlamlığı üçün ürəklərini qoyan təbiblərimizin müqəddəs peşə bayramlarını təbrik edirəm!

Bayramınız Mübarək Həkimlər!

Selcan ABDULLAYEVA