Bu gün Sumqayıt şəhər İcra Hakimiyyətinin təşkilatçılığı ilə Beynəlxalq Əlillər gününə həsr olunmuş tədbir keçirilib. İcra Hakimiyyətindən Xeberle.com-a verilən məlumata görə, tədbirdə Qarabağ Müharibəsi Əlilləri, Veteranları və Şəhid Ailələti İctimai Birliyi, Çernobıl Əlillər İttifaqı, Gözdən Əlillər , Əlil Qadınlar, Əlillərin Beynəlxalq Əməkdaşlığı Uğrunda, Əlillər cəmiyyətlərinin, Veteranlar Şurası, Əfqanıstan Əlillər İttifaqı və digər ictimai təşkilatların yerli şöbələrinin qeydiyyatında olan 100-dən çox əlil iştirak edib.

Tədbiri giriş sözü ilə şəhər İcra hakimiyyəti başçısı aparatının Ərazi idarəetmə və yerli özünüidarəetmə orqanları ilə iş şöbəsinin müdiri Gündüz Əliyev açaraq, şəhər İcra Hakimiyyətinin başçısı Zakir Fərəcovun adından tədbir iştirakçılarını salamlayıb, onun xoş arzularını çatdırıb. G.Əliyev qeyd edib ki, dünya əhalisinin təxminən 10 faizini fiziki cəhətdən qüsurlu insanlar təşkil edir. Azərbaycanda dövlət tərəfindən bu qəbildən olan insanların sosial rifahının yüksəldilməsi istiqamətində mühüm addımlar atılır, bu insanların sosial təminatı ildən-ilə daha da yaxşılaşır: "Azərbaycan BMT Baş Məclisi tərəfindən 2006-cı ildə qəbul edilmiş "Əlillərin hüquqları haqqında” Konvensiyaya qoşulub. Ölkəmizdə əlillərin sosial müdafiəsi ilə bağlı həyata keçirilən geniş miqyaslıi tədbirlərin əsası ulu öndər Heydər Əliyev tərəfindən qoyulub. İnsan amilini xüsusi diqqətdə saxlayan görkəmli dövlət xadiminin Azərbaycana rəhbərliyi dövründə əlillərin sosial müdafiəsi, onların cəmiyyətə inteqrasiyası ildən-ilə gücləndirilib. Ölkədə əlillərin sosial müdafiəsi ilə bağlı dövlət proqramı hazırlanıb. Həmin proqramda əlilliyin qarşısının alınması, əlillərin reablitasiyası və sosial müdafiəsi haqqında qanunun bütün müddəaları öz əksini tapıb. Bakıda və regionlarda əlillər üçün reablitasiya mərkəzləri, protez-ortopedik müəssislər yaradılıb. Ulu öndər Azərbaycanın ərazi bütövlüyü uğrunda şəhid olanların ailələrinə, fiziki sağlamlığını itirən insanlara, onların problemlərinə də böyük həssaslıqla yanaşıb, əlillərin, müharibə veteranlarının, şəhid ailələrinin mənzil şəraitinin yaxşılaşdırılması istiqamətində əhəmiyyətli işlər görüb. Əlillərin, şəhid ailələri və müharibə veteranlarının sosial müdafiəsi Prezident İlham Əliyevin də diqqət mərkəzindədir. Dövlət başçısının əhalinin sosial problemlərinin həllinə xüsusi qayğısı əlillərin də həyat şəraitinin yaxşılaşmasına, onların ictimai hüquqlarının bərpasına şərait yaradıb.”

G.Əliyev bildirib ki, şəhərimizdə də əlillərə, imtiyazlı şəxslərə xüsusi diqqət və qayğı göstərilir.Son dövrlərdə şəhər İcra hakimiyyətinin başçısı Zakir Fərəcovun şəhərdə həyata keçirdiyi geniş abadlıq və quruculuq işlərinin əsasında məhz insanların, xüsusən də sosial qayğıya ehtiyacı olan insanların problemlərinin həlli durur.
Çıxış edənlər, Qarabağ Müharibəsi Əlilləri,Veteranları və Şəhid Ailələri İctimai Birliyi Sumqayıt şəhər şöbəsinin sədri Tərlan Hacızadə, Əlillər Cəmiyyəti Sumqayıt şəhər şöbəsinin sədri İmran Mehdiyev, şəhər Veteranlar Şurasının sədri Leyla Qasımzadə və başqaları göstərilən diqqət və qayğıya görə ölkə və şəhər rəhbərliyinə öz minnətdarlıqlarını bildiriblər.