"Sənətiniz qarşısında papağımızı da, şlyapamızı da çıxardırıq, ancaq xahiş olunur, güclü iqtisadçı olmaq xəyalına düşməyəsiniz"

Bildiyimiz kimi, xalq artisti Ağadadaş Ağayev manatın devalivasiyasını, dolların qalxmasını müsbət hal kimi qiymətləndirərək açıqlama verib ki,  "Əcəb olub, dollar qalxıb”. Bu, ictimaiyyət nümayəndələri, sosial şəbəkələrdə, xüsusən gənclər arasında birmənalı qarşılanmayıb. Belə ki, tanınmış və nüfuzlu sumqayıtlı jurnalist, Osman Mirzəyev adına Respublika mükafatı laureatı Rəhman ORXAN  Xalq artistimizə cavab verib. Həmin cavabı təqdim edirik:

Bəzi saytların verdiyi məlumata görə, sevimli sənətkarımız dolların bahalaşmasına sevinərək deyib: "Əcəb olub, dollar qalxıb”. Ağadadaş müəllim guya bütün xalqın qətiyyən başa düşmədiyi "dollar məsələsini" hamıdan yaxşı başa düşərək, bu cür aydınlaşdırmağa çalışıb: "Biz, məsələn, bir milyon dollar neft satdıq, qazandığımız bir milyon dollar da olur. Amma biz onu Vətəndə dəyərləndirəndə olur bir milyon altı yüz min manat. Və bu bizim büdcəmizə birbaşa müsbət təsir göstərir. Əsas məmləkətin, Vətənin, dövlətin büdcəsi bizim üçün çox önəmlidir. Əcəb olub, dollar qalxıb”. 
Çox-çox təəssüflər ki, mənim də hər zaman böyük hörmət bəslədiyim gözəl sənətkarımız Ağadadaş Ağayev tamamilə səhv analiz verib. İqtisadçı olmadığı üçün analizi də baş-ayaq, tərsinədir. Əgər neft xaricdə bizim manatımızla satılıb, dollar məkanlarından ölkəmizə 1,5 dəfə artıq gəlir gətirsəydi, onda Ağadadaş müəllim deyən kimi olardı. Ancaq bunun harası sevindiricidir və məntiqlidir ki, sənətkarımız deyir: "Biz, məsələn, bir milyon dollar neft satdıq, qazandığımız bir milyon dollar da olur. Amma biz onu Vətəndə dəyərləndirəndə olur bir milyon altı yüz min manat." Qardaş, əzizim Ağadadaş müəllim, o bir milyon dollar xaricdə yox, ölkəmizdə bir milyon altı yüz min manat olursa, biz o altı yüz min manatı amerikalının, avropalının kürkündən, canından yox, öz canımızdan çıxarırıq. Bunun harası gəlirli, mənfəətli oldu?!
Hörmətli Ağadadaş müəllim, Siz bütün xalqımızın sevdiyi çox böyük sənətkarsınız. Sənətiniz qarşısında papağımızı da, şlyapamızı da çıxardırıq. Ancaq xahiş olunur, güclü iqtisadçı olmaq xəyalına düşməyəsiniz. Sizin dollar-manatla bağlı mülahizəniz, "iqtisadi analiz"iniz  kökündən səhvdir, tamamilə yanlışdır! Sənətkar kimi isə Sizin tayınız-bərabəriniz yoxdur!

Xeberle.com