SOCAR-ın "Azərikimya” İstehsalat Birliyinin Etilen-polietilen zavodunun Su təchizatı, susoyutma və kanalizasiya sahəsində "Schneider Electric” şirkəti tərəfindən quraşdırılmış müasir elektrik avadanlıqlarının iş prinsiplərinin xidmət heyətinə öyrədilməsi məqsədilə zavodun bir qrup işçisinə treninq keçirilib.

Qeyd edək ki, "Schneider Electric” şirkəti öz diqqətini əsasən enerjinin təhlükəsizliyi, etibarlılığı, səmərəliliyi, məhsuldarlığı və ekoloji təmizliyi kimi məsələlərə yönəltməklə, dünyanın 100-dən çox ölkəsində öz əməliyyatlarını həyata keçirən bir şirkətdir.

İB-nin Mətbuat xidmətindən Xeberle.com-a verilən məlumata görə, bağlanmış müqaviləyə əsasən "Schneider Electric” şirkətinin mütəxəssisləri 16-22 dekabr tarixlərini əhatə edən dövr ərzində Piroliz qazının sıxılması və təmizlənməsi sahəsindən bir nəfər, Su təchizatı, susoyutma və kanalizasiya sahəsindən bir nəfər, Elektrik avadanlıqlarının təmiri və istismarı sahəsindən iki nəfər, Elektrotexniki laboratoriyadan da iki nəfər olmaqla ümumilikdə EP zavodunun 6 əməkdaşına nəzəri və praktik əməliyyatları əhatə edən treninq – peşəkar təlim keçirilib.

Treninq başa çatdıqdan sonra təlimdə iştirak edən əməkdaşlar imtahana cəlb edilərək qazandıqları nəzəri və praktiki biliklərin hesabatını veriblər. İmtahanda yüksək nəticə göstərdiklərinə görə təlim iştirakçılarının hamısına "Schneider Electric” şirkətinin enerji və infrastruktur üzrə rəhbəri Mirməhəmməd Səməndərzadə tərəfindən sertifikatlar təqdim olunub və onlara fəaliyyət sahələrində uğurlar arzulanıb.