Ulduz axını… bir az obrazlı desək dünən Sumqayıt məhz bu hadisənin şahidi oldu…

Azərbaycanı dünyada layiqincə təmsil edən, fəxrimiz, dünya şöhrətli sənətkarımız Alim Qasımov sumqayıtlıların yeni ilini və dünya azərbaycanlıların həmrəylik gününü təbrik etməyə Sumqayıta gəldi. Bu dahi sənətkarın ecazkar səsinə Mənsum İbrahimov, Təyyar Bayramov, Elnarə Abdullayeva, Gülyaz və Gülyanaq Məmmədovalar kimi sənət fədailərimiz səs verdi. Muğamın sehrinə dalan tamaşaçıların görkəmli sənətkarlarımız Baloğlan Əşrəfovun, Nadir Qafarzadənin, Mənzurə Musayevanın, şən, şux mahnılarına qol qaldırıb oynaması, tanınmış aparıcı Əkbər Əlizadənin bir-birindən maraqlı parodiyaları, H.Ərəblinski adına Sumqayıt Dövlət Dram Teatrının aktyorlarının çıxışı, şəhərimizin "Dostluq” mədəniyyət evinin "Şahinlər”, C.Cabbarlı adına mədəniyyət evinin "Turan” rəqs kollektivlərinin "Azərbaycan suitası”nı birgə rəqsi, sumqayıtlı gənc ifaçıların mahnı sovqatı tədbiri daha da rövnəqləndirdi.

Qərb sarayına toplaşan sənət ulduzlarımızla yanaşı Azərbaycanın bayrağını öləmizdə və ölkəmizin hüdudlarından kənarda fəxrlə və qalibiyyətlə daşıyan, başda Sumqayıtın və eləcə də Azərbaycanın fəxri sayılan İlham Zəkiyev olmaqla çıxışlarını efirlərdən fəxrlə izlədiyimiz idman ustalarımız, mədəniyyət, təhsil, səyiyyə sahəsində çalışan aparıcı qüvvələr də işturak etdi. Sumqayıt şəhər icra hakimiyyətinin başçısı Zakir Fərəcov tədbirə qatılaraq əlamətdar günlər münasibətilə sumqayıtlıları təbrik edərək, regionların sosial-iqtisadi inkişafından, quruculuq və abadlıq işlərinin Sumqayıt şəhərində də sürətlə aparılmasından danışdı və əməyi, fəaliyyəti ilə şəhərimizn adını hər zaman yüksəklərə qaldıran qabaqçılları təbrik etdi, hədiyyələr və fəxri fərmanlar təqdim etdi.

Tamaşaçılar arasında şən əhval-ruhiyyə, xoş münasibət yaradan tədbir Heydər Əliyev parkında atəşfəşanlıqla sona yetdi.

Biz mədəniyyət işçiləri belə yüksək səviyyədə bir tədbirin keçirilməsinə, təşkilinə, biz sumqayıtlılara verdiyi bayram töhfəsinə görə Sumqayıt şəhər icra hakimiyyətinin başçısı Zakir Fərəcova minnətdarlığımızı, öz fəaliyyətimizlə hər zaman ona dəstək olacağımızı bildiririk.

Sumqayıt mədəniyyət müəssisələrinin kollektivləri