Şəhər rəhbərliyi Sumqayıtın əsas küçəsi sayılan Sülh küçəsində söküntüyə qərar verib. Obyektlər artıq sökülmək üzrədir. Qeyd edək ki, bu küçədə əsasən marketlər, geyim və elektrotexnika dükanları, restoranlar, şirniyyat mağazaları olmaqla 170 ticarət və iaşə obyekti var və onlar uzun illərdir ki, fəaliyyət göstərirlər. Qeyd edək ki, artıq buna qədər maliyyə böhranı ilə əlaqədar Sumqayıtın Sülh küçəsində bir neçə obyekt bağlanıb və işçilər ixtisara düşüb. Belə ki, "Access bank”ın küçənin 1-ci mikrorayon ərazisindəki filialı, "Unibank”ın 30-cu məhəllə ərazisindəki filialı bağlanılıb. Bir neçə obyektin də maliyyə problemləri səbəbindən qapadılması gözlənilir. Küçədəki ticarət mərkəzlərindən birinin sahibi bildirib ki, obyektinin bütün lazımi sənədləri qaydasındadır və tam qanuni fəaliyyət göstəririrlər. Bununla belə obyektini sökürlər. Digəri isə deyib ki, bu obyekti mən icarəyə vermişəm və buradan 3 ailə dolanır. Sabah sökülərsə, mən necə edim?! Sahibkarlar obyektlərinin sökülməsini narazılıqla qarşılayırlar. Onlar bununla bağlı kompensasiya istəyirlər.Sahibkarların bildirdiyinə görə, İcra Hakimiyyətindən obyektlərin niyə söküldüyü haqda onlara heç bir izahat verilmir. Məsələ ilə bağlı Sumqayıt Şəhər İcra Hakimiyyətinə müraciət etdik. Şəhər rəhbərliyi bu addımını şəhərin əsas küçəsində sıxlığın olmaması, küçənin daha səliqəli, rahat və geniş – bir sözlə 30 il əvvəlki qiyafəsinə qaytarmaq niyyəti ilə izah edir: "Biz şəhərin baş planına əsasən hərəkət edirik və baş plana uyğun olmayan, həmçinin tikinti qaydalarına uyğun olmayan, şəhərin estetikasını pozan, qanunsuz obyektlər söküləcək. Sülh küçəsində avtomobiilərin rahat park edilməsi üçün böyük avtodayanacaq da tikiləcək. Artıq tikilinin planı, eskizi də mövcuddur.”
Xeberle.com