Son günlər şagirdin müəllim tərəfindən vəhşiliklə döyülməsi faktı ölkə mətbuatının gündəmindədir. Belə şiddətə məruz qalan şagirdlərin hansı psixoloji zərbələrə məruz qaldığını aydınlaşdrmaq üçün Ümumrusiya Peşəkar Psixoterapevtler Liqasının üzvü, psixoloq Elnarə Eminova ilə əlaqə saxladıq. O, şiddət görən şagirdlərdə ilk növbədə özgüvənsizlik, zəiflik yarandığını, qarşı tərəfə aqressiv münasibət formalaşdığını qeyd edib: "Nəticədə həmin şagird qeyri-adekvat davranış irəli sürür. Şagirdin əzilməsi və gördüyü şiddət onu gələcəyin cinayətkarına çevirir. Belə şagirddə birbaşa özünəqapanma və depresiya halları yaranır”.

Psixoloq bildirib ki, nə olursa olsun, müəllim şagirdə səbrlə yanaşmalıdır: "Məktəblərdə psixoloqun fəaliyyət göstərməsi çox önəmlidir. Bu cür şiddətin, münaqişənin baş verməməsi üçün məktəb psixoloqları mütəmadi şəkildə heç olmasa, ayda bir dəfə uşaqlarla görüşüb, onlar arasında psixoloji testlər keçirməli, hazırki durumları ilə maraqlanmalıdırlar. Çünki hər bir şagird müxtəlif ailələrdən gəlir və müəyyən problemlər yaşayırlar”.(sia.az)