Kimlər gəlib keçmədi ki, bugünkü gənclikdən? Şahin Təhməzov - Naxçıvan Ədliyyə nazirinin müavini, Naxçıvan Pentensiar xidmətin rəisi, Ədliyyə polkovniki. Bəli, ona aid olan titulları saymaq bitmir. Amma onun bu həyatla vidalaşdığı 40 gün artıq bitir... Şahin Təhməzov 1967-ci ildə Zəngilanda anadan olmuşdur. Naxçıvan Dövlət Universitetini bitirib. Tale Ş.Təhməzovu ona Zəngilan qədər doğma olan Naxçıvanda yaşatmışdır, ucaltmışdır. Ucalmaq da bir ailəmdir, özü də Şahin kimi. Ş.Təhməzovun Ədliyyə sahəsində olan xidmətləri yüksək qiymətləndirilmiş, vətənin ən yüksək adlarına layiq görülmüş, bir sıra orden və medallarla təltif olunmuşdur. 2012-ci ildə cənab prezident İlham Əliyev tərəfindən Şahin Təhməzov "Dövlət qulluğunda fərqlənməyə görə» medalı ilə təltif olunmuşdur. Beləcə fərqlənən bir insanı hamı çox sevirdi: qohumları, yoldaşları, həmkarları və övladları da. Rəqəmlərə baxanda Ş.Təhməzov o qədər də uzun yaşamamışdı. Amma həmin 48 ili dolduran hadisələri, polkovnikin keçdiyi yolların eniş-yoxuşlarını, gördüyü bolluca işləri, yaratdığı bir ömrə sığmayacaq zəngin fəaliyyəti göz önünə gətirəndə fikirləşirsən ki, o əslində olduğundan ikiqat uzun həyat sürüb. Ömür yolu beləcə vaxtsız qırılmasaydı... 4 balaca övlad ata qayğısından, sevgisindən məhrum olmasaydı. Hələ balaca əkizlər... Onlar ki, ata məhəbbətindən doymadı. Hara tələsirdi o? Övladlarını, sevdiyi peşəsini yarımçıq qoyaraq... Burda Türk şairi Necip Fazılin şeiri yada düşür .. Eve dönmez bir akşam, Ve gün yüzlü çocuğu sorar : Nerede babam ? Bakarlar, oldu, bitti. İllər keçsə də Şahin Təhməzov övladlarının gözündə çiyni paqonlu ATA kimi canlanacaq. Deyirlər, insan dünyaya gələn andan həm də böyük ölçüdə ölümünə hazırlaşır. Xoşbəxt o insandır ki, elə yaşayır, elə çalışır, yaddaşlara, ürəklərə elə hopur ki, dünyadan ayrılanda da hansı yaşda olmasına baxmayaraq hər kəs gedişinə təəssüf edir. Və könüllərdən minnətdarlıq duyğusu keçir ki, nə yaxşı vardınız, nə yaxşı ki, məhz belə olmağınızla, belə ömür sürməyinizlə dünyanı bir qədər də gözəl etdiniz... Şahin Təhməzov kimi. Vaqif Səmədoglu ölmündən öncə yazırdı: "Mən heç vaxt şeirlərimin sonuna nöqtə qoymuram. Ümumiyyətlə, nöqtəni sevmirəm. Qəribə bir sonluq əhval-ruhiyyəsi yaradır. Vergül ona baxanda daha insaflıdır. Ən azı, ardınca davamiyyət tələb edir. Mən hətta Allahdan da arzu edirəm ki, öləndə belə mənə nöqtə qoymasın". Bəli, onsuz da ölüm bütün istedadlı və məgrur insanların ömrünə nöqtə qoya bilmir” . Sizin vaxtsız və qəfil ölmünüz heç bir qəlbə nöqtə qoymayacaq, Şahin müəllim.
Allah rəhmət eləsin!
Təranə Şükürlü
Xeberle.com