Azərbaycan Respublikasının Prezidenti yanında Gənclər Fondunun maliyyə, Mədəniyyət və Turizm Nazirliyi, Sumqayıt şəhər Gənclər və İdman Baş İdarəsi, həmçinin, "SAĞLAM DÜŞÜNCƏ” Gənclər Təşkilatının təşkilatı dəstəyi ilə "Sumqayıt yeniyetmələrinin ilk vokal müsabiqəsi”nin "Qala konsert”i Sumqayıt şəhər Bülbül adına 2 saylı Uşaq İncəsənət məktəbində baş tutub.Sumqayıt şəhərində keçirilən müsabiqənin əsas məqsədi yeniyetmə və gənclərimizdə bu musiqiyə marağın artırılması, bu sahəyə töhfə vermiş azərbaycanlıların təbliği, eləcə də, bu musiqi janrı ilə məşqul olan yeniyetmələri və vokal musiqisini diqqət mərkəzində saxlamaqdır.

Layihənin təşkilatçısı Təbriz Xosrovun verdiyi məlumata görə, layihəyə 50-dən çox namizəd sənədlərini vermiş, lakin 25 namizədin sənədləri komissiya tərəfindən təsdiqlənmişdir. Daha sonra yeniyetmə namizədlərlə əlaqə saxlanılmış və münsiflər heyəti qarşısında çıxış üçün dəvət olunmuşdur. Daha sonra münsiflər heyəti tərəfindən "Qala konsert”ə 10 iştirakçı seçilmişdir. "Qala konsert”in son hazırlığında iştirakçıların yenidən qiymətləndirilməsi aparılmış və qalib münsiflərin balları əsasında seçilmişdir.
Təbriz Xosrov layihəyə Gəncə, Lerik, Şəmkir, Biləsuvar kimi digər bölgələrdən də müraciət etmək istəyən namizədlərin olduğunu vurğulayıb.
Müsabiqə iştirakçıları peşəkar münsiflər heyəti tərəfindən qiymətləndirildi. Münsiflər arasında əməkdar müəllim, əməkdar artist adını almış və həmçinin beynəlxalq festivallar lauriyyatı olmuş şəxslər də var idi. "Qala konsert”in sonunda "Sumqayıt yeniyetmələrinin ilk vokal müsabiqəsi”nin qalibinin adı açıqlandı. Bütün iştirakçılar hədiyyələrlə təltif olundu.
Tədbirin qalibləri I yer Adıgözəlli Mirməhəmməd, II yer Cəbrayılov Riad, Məmmədli Kənan, III yer Namazova Lalə, Aslanova Şahnaz, Abdalov Murad seçilmişdir.