Sahibkar Dönməz Məmmədov ona qarşı təzyiq olduğunu deyir.
Xəbər verdiyimiz kimi, Fevralın 5-i səhər saatlarında bir nəfər şəxs Bakıda Nəqliyyat Nazirliyinin yanındakı körpüyə çıxaraq intihar etmək istəyib. Bu barədə sosial şəbəklərdə hadisə yerində olan Bakı sakinləri yazıblar. Onlar bildirirlər ki, həmin şəxs Azərbaycan bayrağına bürünüb və əlində benzinlə dolu şüşə var. O, insanların yaxınlaşmasını istəməyib:
"Heç kim yaxınlaşmasın. Yoxsa özümü əvvəlcə yandırıb, sonra körpüdən atacağam".
Hadisə yerində olan jurnalistlərin Meydan TV-yə verdiyi məlumata görə, Nəqliyyat Nazirliyinə dəvət olunan sahibkar oradan çıxandan sonra maşına mindirilərək, naməlum istiqamətə aparılıb. Onun jurnalistlərlə danışmasına imkan verilməyib.
Buna qədər Dönməz Məmmədov dəfələrlə problemi haqda mətbuata məlumat verib. O, bir sahibkar kimi fəaliyyətinə əngəllər yaradıldığını bildirib. Həmin şəxsin "Amal-D" MMC şirkətinin rəhbəri sahibkar Dönməz Məmmədov olduğu deyilir. O, Bakı-Saray-Sumqayıt xətti üzrə işləyən 501 nömrəli marşrut avtobuslarınin sahibkarıdır. Sahibkar ona qarşı təzyiq olduğunu və buna görə intihar etmək istədiyini deyib.