Fövqəladə Hallar Nazirliyinin Sumqayıt Regional Mərkəzi 10 fevral 2016-cı il tarixində Sumqayıt şəhəri 4 nömrəli tam orta məktəbdə "Həyatının təhlükəsizliyi sənin öz əlindədir!” mövzusunda maarifləndirmə tədbiri keçirmişdir. 

FHN Sumqayıt Regional Mərkəzindən Xeberle.com-a verilən məlumata görə, tədbirdə Fövqəladə Hallar Nazirliyi Sumqayıt Regional Mərkəzinin, Sumqayıt şəhər Dövlət Yanğından Mühafizə İdarəsinin, Sumqayıt şəhər Təhsil Şöbəsinin əməkdaşları, məktəbin müəllim və şagirdləri iştirak etmişlər.

Tədbir nəzəri və praktik olmaqla iki hissədən ibarət olmuşdur.

Tədbirin nəzəri hissəsində Mərkəzin əməkdaşları "Fövqəladə hallar zamanı davranış qaydaları”, "Təhsil müəssisələrində yanğın təhlükəsizliyi qaydaları”, "Məişətdə qaz cihazlarından istifadə qaydaları”, "Elektriklə davranış qaydaları”, "Zərərçəkmiş insanlara ilkin tibbi yardımın göstərilməsi” və "112” qaynar telefon xətti təhlükəsizliyimizin qarantıdır” mövzularında çıxışlar etmişlər.

Çıxışlardan sonra Fövqəladə Hallar Nazirliyinin hazırladığı "Dəm qazı təhlükəsi” adlı videoçarx nümayiş olunmuşdur.

Daha sonra suallar cavablandırılmış və təbliğat materialları, yaddaş kitabçaları, bukletlər paylanılmışdır.

Tədbirin praktiki hissəsində məktəbin həyətində Regional Mərkəzin və Sumqayıt şəhər Dövlət Yanğından Mühafizə İdarəsinin qüvvə və texnikasına baxış keçirilmiş, onların təyinatı və istifadəsi qaydaları haqqında məlumat verilmişdir.
Xeberle.com