Azərbaycanın avtomobil yollarında dəmir arakəsmələrin betonlarla əvəz olunamasına başlanılıb. Beton arakəsmələr həm şəhərlərarası, həm də Bakının giriş - çıxış hissələrində qoyulur.
"Azəryolservis" ASC-nin mətbuat xidmətinin rəhbəri Anar Nəcəfli sayta açıqlamasında bildirib ki, artıq Bakı Beynəlxalq Avtovağzalının qarşısından təxminən 2 kilometrlik məsafədə dəmir arakəsmələr beton plitələrlə əvəzlənib. Onun sözlərinə görə, ilkin mərhələdə avtovağzalın qarşısından "Ekologiya postu" deyilən əraziyə qədər olan yoldakı arakəsmələr əvəz ediləcək. "Posta qədər olan 2 kilometrlik məsafədə arakəsmələr beton plitələrlə əvəz edilib. Şəhərdaxili yollarda belə beton plitələrdən istifadə olunmur", - deyə qurum rəsmisi bildirib.
Anar Nəcəfli qeyd edib ki, Azərbaycan istehsalı beton arakəsmələrdən Bakı - Ələt - Qazax yolunun Hacıqabul - Kürdəmir hissəsində, Şamaxı yolundakı Sulutəpə dairəsindən Müşviq qəsəbəsinə qədər olan məsafədə istifadə edilib.
Qurum rəsmisi bildirib ki, yollarda dəmir arakəsmələrin beton plitələrlə əvəzlənməsi iqtisadi cəhətdən də sərfəlidir.
"Qəzalar baş verən zaman avtomobillərlə yanaşı dəmir arakəsmələrədə ziyan dəyir. Bu isə yol təsərrüfatının korlanması ilə nəticələnir. Dəmirləri dəyişdirmək isə əlavə xərc tələb edir. Bu arakəsmələrin dəyişdirilməsi də asan və ucuz başa gəlir. Həmçinin dəmir arakəsmələrdən fərqli olaraq, betonlar zərbəyə daha dözümlüdür. Beton arakəsmələrin aşağı hissəsində təkər qaytaran əyri hissə var. Bu hissə olduğu üçün qəza zamanı arakəsmə ilə avtomobil arasında birbaşa əlaqə azalır. Nəticədə həm avtomobilə, həm də yol infrastrukturuna az ziyan dəyir", - deyə Anar Nəcəfli bildirib.
Azərbaycanda bəzi avtomobil yollarında dəmir arakəsmələrin keyfiyyəti ucbatından qəzalar zamanı ağır itkilər qeydə alınıb. Son dəfə isə belə hadisə 2015-ci il sentyabr ayının 17-də baş verib. Bakı - Sumqayıt yolunda mikroavtobus maneəyə çırpılıb. Nəticədə insan tələfatı daha da artıb.
Oktyabr ayında isə Bakı-Sumqayıt yolunda avtomobil dəmir arakəsməyə çırpılıb. Qəza o qədər şiddətli olub ki, dəmir arakəsmə avtomobilin qabaq hissəsindən girərək arxasından çıxıb...
Sonda onu da qeyd edək ki, əksər hallarda baş verən qəzalarda sürücülər yol infrastrukturuna dəyən ziyanı ödəməkdən imtina edir. Bu səbəbdən dəyən ziyan dövlət tərəfindən ödənilir. Elə buna görə də belə beton arakəsmələrin olması həm sürücülərə, həm də dövlətə sərf edər. Çünki yeni arakəsmələr qəza zamanı avtomobilə və yol infrastrukturuna dəyən ziyanı minumuna endirir.
Xəbərdən istifadə edərkən istinad etmək vacibdir.