Sumqayıt şəhərində, 11-ci mikrorayon ərazisində yerləşən bu mağaza mikrorayon sakinlərinə yaxşı tanışdır.
Mağazanı yaxınlıqdakı və şəhərimizdə yerləşən digər mağazalardan fərqləndirən əsas cəhət isə burada siqaret və spirtli içkilərin satılmamasıdır. Mağaza sahibi Əhməd bəy  bildirdi ki, artıq 8 ilə yaxındır ki mağazasında siqaret və spirtli içkiləri satmır. Səbəbini soruşduqda isə belə cavab verir:"Səbəb çox sadədir. Özümə, öz ailəmə rəva bilmədiyimi başqalarına necə rəva görə bilərəm ki..."
Əvvəllər bu addımı alıcılar tərəfindən birmənalı qarşılanmasa da, artıq hamı buna öyrəşib. Mağaza sahibi bildirir ki, işləri heç də pis getmir, müştəri sarıdan əziyyət çəkmir. Biz də mağazada olduğumuz bir neçə dəqiqə ərzində bunun şahidi olduq. Uşaqdan böyüyədək bütün alıcılar mağazaya daxil olur, Əhməd bəylə mehribancasına görüşür, hal-əhval tutduqdan sonra alacağını alıb, razılıq edərək yollarına davam edir. Ara-sıra yumorundan, lətifələrindən də qalmır Əhməd bəy. Bir də satdığı məhsulları məxsusi tərifləməsi var. Ümumiyyətlə, müsbət bir əhval-ruhiyyə hökm sürür Əhməd bəyin mağazasında.
Bir qədər söhbətləşdikdən sonra Əhməd bəyə minnətdarlıq edib böyük məmnuniyyət hissi ilə mağazanı tərk edirik.Ümid edirik ki, şəhərimizdə belə mağazaların sayı gün keçdikcə artar və sayları daha çox olar. (yenisumqayit.az)