Fövqəladə Hallar Nazirliyinin Sumqayıt Regional Mərkəzi  Abşeron rayonu, Masazır kənd 2 nömrəli tam orta məktəbdə "Həyatının təhlükəsizliyi sənin öz əlindədir!” mövzusunda maarifləndirmə tədbiri keçirib. Nazirliyin saytının yaydığı məlumata görə, tədbirdə Abşeron rayon Dövlət Yanğından Mühafizə Hissəsinin, Abşeron rayon Təhsil Şöbəsinin əməkdaşları, məktəbin müəllim və şagirdləri iştirak ediblər.
Tədbir nəzəri və prakti olmaqla iki hissədən ibarət olub.
Tədbirin nəzəri hissəsində Mərkəzin əməkdaşları "Fövqəladə hallar zamanı davranış qaydaları”, "Təhsil müəssisələrində yanğın təhlükəsizliyi qaydaları”, "Məişətdə qaz cihazlarından düzgün istifadə qaydaları”, "Elektriklə davranış qaydaları”, "Zərərçəkmiş insanlara ilkin tibbi yardımın göstərilməsi” və "112” qaynar telefon xətti təhlükəsizliyimizin qarantıdır” mövzularında çıxışlar ediblər.
Çıxışlardan sonra Fövqəladə Hallar Nazirliyinin hazırladığı "Dəm qazı təhlükəsi”, "Odsöndürücü balondan istifadə qaydaları” və "Novruz bayramı ilə bağlı yanğın təhlükəsizliyi” adlı videoçarxlar nümayiş olunub.

Daha sonra suallar cavablandırılmış və təbliğat materialları, yaddaş kitabçaları, bukletlər paylanılıb.

Tədbirin praktik hissəsində məktəbin həyətində Regional Mərkəzin və Abşeron rayon Dövlət Yanğından Mühafizə Hissəsinin qüvvə və texnikasına baxış keçirilib, onların təyinatı və istifadəsi qaydaları haqqında məlumat verilib.