Ermənistanın Armavir vilayətinin Arşalyus bölgəsində 21 iyulda keçiriləcək Avropa  Oxçuluq yarışmasına Azərbaycan da dəvət olunub. Modern.az saytının xəbərinə görə, bu barədə Ermənistanın Oxçuluq Federasiyasının prezidenti Boris Vasilyan erməni KİV-nə məlumat verib. O, bildirib ki, Avropa ölkələri ilə yanaşı, Türkiyə və Azərbaycanın da yarışda iştirak edəcəyi gözlənilir.

Azərbaycan Gənclər və İdman Nazirliyindən Modern.az-a xəbəri təsdiqləyiblər. Bildirilib ki, idmançılarımız həmin turnirdə iştirak etmək üçün Ermənistana səfər edəcək. 

Nazirliyin mətbuat xidmətinin rəhbəri Səmayə Məmmədova Modern.az saytına açıqlamasında Ermənistana gedəcək heyətin tərkibi barədə də məlumat verib: 

“ Heyətin tərkibi 6 idmançı, 1 məşqçi və 1 nümayəndədən ibarətdir. Bu məqamda Avropa Çempionatında bizim idamançılarımızın iştirak etməsi çox önəmlidir. Çünki Avropa Oxatma Federasiyası bizə şərt irəli sürüb ki, Azərbaycan bu çempionatda iştirak etməlidir ki, gələn il  Bakıda keçiriləcək Avropa oyunlarında iştirak etmək hüququ qazansın. Eyni zamanda gələn il ölkəmizə gələcək olan idmançıların da bu çemopionatda iştirakı vacibdir. Ermənistan tərəfi təhlükəsizlik məslələrini öz üzərinə götürüb və qeyd edilib ki, iştirakçıların təhlükəsizliyi tam təmin olunacaq”,-deyə S. Məmmədova qeyd edib.

Rüfanə GÜNƏŞ