Erməni tərəfindən öldürüldüyü bildirilən Həsən Həsənov haqda yeni xəbər alınıb. Onun yaşadığı Binəqədi rayon sakinləri iddia edir ki, Həsən Kəlbəcərə yox, Rusiyaya gedib, çünki əvvəllər də o, tez-tez Rusiyaya gedirmiş.

ANS PRESS Həsən Həsənovun Binəqədi rayonunda yerləşən evində olub. Onun qonşuları Həsənin mərd və qorxmaz bir insan olduğunu dedilər.

Məhəllə sakinləri Həsənin öldürülməsi haqda yayılan xəbərlərin yalan olduğunu vurğuladılar. Onlar iddia edir ki, H. Həsənov Rusiyaya gedib: 

“Onun iki körpə uşağı var. Yoldaşı isə İmişli rayonundandır. Onlar 10-15 gün bundan öncə istirahət etmək üçün rayona gediblər. Həsən öldürülməyib, ailəsi də buna inanmır. O, çox vətənpərvər oğlan idi. Onun ürəyi doğulub boya-başa çatdığı Cəbrayıla bağlı olub. Bütün Binəqədi onu yaxşı oğlan kimi tanıyır”.

Xatırladaq ki, bir neçə gün əvvəl erməni mediasında iki azərbaycanlının tutulması və birinin isə öldürüldüyü xəbəri yayılmışdı. Öldürülən azərbaycanlının Həsən Həsənov adlı Cəbrayıl rayon sakini olduğu bildirilir. Ermənilər doğma Kəlbəcərə yaxınlarının qəbrini ziyarət etmək üçün gedən Dilqəm Əsgərovu və Şahbaz Quliyevi diversant kimi qələmə verməyə çalışır.