Məlumat verdiyimiz kimi, martın 22-də gecə saatlarında Sumqayıt şəhərində qətl hadisəsi törədilib. Hadisə zamanı 13-cü mikrorayon sakini 1989-cu il təvəllüdlü Namiq Məmmədov bıçaqlanaraq qətlə yetirilib.
Mərhumun qonşusu Rəşad Abbasov qətl törədilən gün həyətdə olub, Namiqin vəziyyətinin pisləşdiyini görüb evlərinə xəbər edib. Elə bundan sonra R.Abbasov Sumqayıt şəhər Polis İdarəsinin 1-ci bölməsinə şahid qismində dəvət edilib. Hər şey bundan sonra başlayıb. O iddia edir ki, Sumqayıt şəhər Polis İdarəsinin 1-ci polis bölməsində polis əməkdaşları və zabitləri tərəfindən fiziki zorakılığa məruz qalıb.
Xeberle.com-un məlumatına görə facebook sosial şəbəkəsində fəaliyyət göstərən "Sancaq” səhifəsinin admini Mehman Hüseynov R. Abbasovla bağlı videosüjet yayımlayıb. Videomaterialda R.Abbasov bildirib ki, Sumqayıt şəhəri 1-ci polis bölməsində rəis və digər əməkdaşları tərəfindən fiziki təzyiq görüb, dəyənək, fiziki güc və elektroşok vasitəsilə dəhşətli işgəncələrə məruz qalıb. Onun söylədiklərinə görə, bu işgəncələrdən sonra polis əməkdaşları həqiqi cinayəti törədən şəxsin yaxalandığını, onun səhvən saxlandığını bildiriblər və Rəşadı sərbəst buraxıblar.
Facebook sosial şəbəkəsində yayılan videomaterialdan bir gün sonra Xeberle.com olaraq məsələnin mahiyyətini öyrənmək üçün Sumqayıt şəhər Təcili Tibbi Yardım Xəstəxanasına üz tutduq. Öyrəndik ki, Rəşad Abbasov xəstəxananın III korpusunda 8-ci palatada müalicə alır. Palatanın önündə R. Abbasovun yaxınları bizi görcək əhatəyə alıb sorğu-suala tutdular. Gəlişimizin məqsədini anlatdıqdan sonra polis tərəfindən döyüldüyü iddia olunan gəncin yatdığı palataya daxil olduq. R.Abbasovdan baş verənlərlə bağlı müsahibə götürmək istədiyimizi bildirdik. Amma R.Abbasov və yaxınları onun israrla müsahibə verməyəcəyini bildirdilər. Bir qədər məsləhətləşdikdən sonra qəti olaraq bu barədə danışmaqdan imtina etdilər.
Həmçinin Sumqayıt şəhər Polis İdarəsinin 1-ci polis bölməsi ilə telefon əlaqəsi saxladıq. Növbətçi hissənin rəisi Məmmədov telefonla açıqlama vermək səlahiyyətində olmdığını söylədi və bunun üçün mütləq bölməyə gəlməyimizin vacib olduğunu bildirdi.
Məlumat üçün qeyd edək ki, artıq Sumqayıt şəhəri 13-cü mikrorayon ev 6-nın qarşısında Namiq Məmmədovu bıçaqlayaraq öldürən şəxsin Sumqayıt şəhər sakini, 1996-cı il təvəllüdlü Babək Atamalıyev olduğu müəyyən edilib.
R.Abbasovun söylədiklərinə gəldikdə isə bu Sumqayıt polisinə qarşı ciddi ittihamlardır və ümidvarıq ki, məsələ ilə bağlı ictimaiyyət məlumatlandırılacaq.
Xeberle.com
Xəbərdən istifadə edərkən istinad etmək vacibdir.
