Son illər Azərbaycan Respublikası Prezidenti cənab İlham Əliyevin böyük əzmlə və uğurla həyata keçirdiyi daxili və xarici siyasət nəticəsində Azərbaycan davamlı inkişaf yolu ilə inamla addımlayır. Əsası ümumilli lider Heydər Əliyev tərəfindən qoyulmuş gənclər siyasəti də bu gün Azərbaycan Respublikasının Prezidenti cənab İlham Əliyev tərəfindən uğurla davam etdirilir. Ölkəmizdə dövlət tərəfindən gənclərin elmə, intellektual işlərə cəlb edilməsi üçün bütün lazımı addımlar atılır. Gənclərin elmə cəlb edilməsi, cəmiyyətimizin inkişafında onların bilik və bacarıqlarından, ideya və təşəbbüslərindən istifadə olunması istiqamətində mühüm işlər görülür.

Prezident İlham Əliyevin sərəncamları ilə gənclərin inkişafı ilə bağlı mərhələli şəkildə çox mühüm dövlət proqramları qəbul olunub həyata keçirilir. Bunlardan əlavə dövlət başçısının fərmanları ilə gənclərinin elm, mədəniyyət, o cümlədən ədəbiyyat və incəsənət, təhsil və ictimai fəaliyyət sahələrində nailiyyətlərini təşviq etmək məqsədilə Azərbaycan Respublikasının Prezidenti yanında Gənclər Fondu yaradılmış, Gənclər üçün Prezident Mükafatı təsis edilmişdir. Bu siyasətin davamı olaraq əksər dövlət qurumları və təşkilatlarda gənclərin inkişafına xidmət edən tədbirlər təşkil edilir, müxtəlif müsabiqələr keçirilir.

Dövlət başçısının 11 mart 2016-cı il tarixli Sərəncamı ilə 2016-cı ilin Azərbaycan Respublikasında "Multikulturalizm ili” elan edilməsinə dair Tədbirlər Planı təsdiq edilmişdir. Həmin Tədbirlər Planına əsasən verilmiş tapşırıqlardan biri də gənclər arasında multikulturalizm mövzusunda müxtəlif intelektual tədbirlərin, xüsusən elmi-publisistik məqalə və yaradıcılıq müsabiqələrinin keçirilməsi olmuşdur. Bütün bunlar, təbii ki, gənc nəsildə intelektual əməyə olan marağın artmasında əhəmiyyətli rol oynayır.

9 noyabr 2015-ci il tarixində Azərbaycan Milli Elmlər Akademiyasının 70 illiyik yubileyinə həsr olunmuş Ümumi yığıncaq keçirilmişdir. Ümumi yığıncaqda Azərbaycan Respublikasının Prezidenti İlham Əliyev dərin məzmunlu nitq söyləmişdir. Dövlət başçısının həmin nitqindən irəli gələrək AMEA-nın Rəyasət Heyəti qərar qəbul etmiş və həmin qərara əsasən verilmiş tapşırıqlardan biri də Multikulturalizm konsepsiyasının elmi-nəzəri əsaslarının tədqiqi və fundamental istiqamətlərinin müəyyənləşdirilməsi ilə bağlı ictimai və humanitar elmlər sahəsində araşdırmaların daha da genişləndirlməsidir. Bu da onu göstərir ki Azərbaycanda elminin gənc nümayəndələri də öz tədqiqatlarında bu istiqməti əsas prioritet kimi götürməlidirlər.

Dövlət başçısı AMEA-nın 70 illik yubileyinə həsr olunmuş Ümumi yığıncaqda söylədiyi nitqdə bir daha vurğulamışdır ki, "Multikulturalizm Azərbaycanda dövlət siyasətidir və eyni zamanda, ictimai sifarişdir. Çünki bu, bizim üçün normal həyat tərzidir...”

Multikulturalizmin bir ideoloji məsələ kimi öyrənilməsi milli təfəkkürdə multikultural dəyərlərin yer alması və inkişafına, eyni zamanda beynəlxalq imicimizin yüksəlməsinə müsbət təsir edəcəkdir. Azərbaycan tarixi prosesin bütün mərhələlərində multikultural dəyərlərin yaşandığı bir coğrafi məkan kimi tanınmış, bu gün də mədəniyyətlər və dinlərarası dialoqun unikal məkanına çevrilmişdir.

Azərbaycanın dünyaya tolerantlıq nümunəsi olaraq daha geniş tanıdılmasının vacibliyini, eləcə də ayrı-ayrı ölkələrdəki müxtəlif multikultural modellərə xas fəlsəfi, sosial, siyasi və digər aspektlərin Azərbaycan reallığında təhlili və təşviqinin əhəmiyyətini nəzərə alaraq Azərbaycan Respublikasının Prezidenti İlham Əliyevin 15 may 2014-cü il tarixli Fərmanı ilə Bakı Beynəlxalq Multikulturalizm Mərkəzi yaradılmışdır. Bakı Beynəlxalq Multikulturalizm Mərkəzinin təşkilatçılığı ilə "Azərbaycan multikultualizmi” bir fənn kimi Avropanın bəzi universitetlərində tədris olunur. Eyni zamanda Mərkəz tərəfindən gənclər üçün qısa müddətli yay-qış məktəbləri təşkil edilir, məktəblilərlə görüşlər keçirilir, həmçinin Azərbaycanın bölgələrində multikultualizm və tolerantlıq mövzularında seminarlar təşkil edilir.

2015-2016-cı illərdə Bakı Beynəlxalq Multikulturalizm Mərkəzinin təşkilatçılığı ilə keçirilmiş "Multikulturalizm Azərbaycanda həyat tərzi kimi: öyrən, araşdır, paylaş” adlı beynəlxalq yay-qış məktəblərində dünyanın müxtəlif ölkələrinin universitetlərindən və yerli universitetlərdən tələbə və alimlər iştirak etmiş, Azərbaycanın mədəniyyətinin multikultural və tolerant elementləri ilə tanış olmuşlar.

Ölkəmizin dini etiqad azadlığı sahəsində vahid dövlət siyasətinin formalaşmasında iştirak edən və bu siyasətin həyata keçirilməsini təmin edən Azərbaycan Respublikasının Dini Qurumlarla İş üzrə Dövlət Komitəsi tərəfindən də multikulturalizm və tolerantlıq mövzularında da paytaxda və bölgələrdə gənclər üçün əhəmiyyət kəsb edən müxtəlif tədbirlər təşkil edilir, müsabiqələr keçirilir, əhəmiyyətli layihələr reallaşdırılır.

Multikultural cəmiyyətlərin formalaşmasına təsir edən əsas proseslərdən biri olan qloballaşma prosesi çərçivəsində ölkəmizdə mültikultural və tolerant dəyərlərin inkişaf etdirilməsi daha uğurlu alınır. Çünki, sivilizasiyaların qovşağında yerləşən Azərbaycanın özü daha zəngin mədəni-mənəvi irsə və tolerantlıq ənənələrinə malikdir. Bu prosesdə qloballaşmanın müsbət və mənfi tərəflərinin araşdırılması, Multikulturalizm konsepsiyasının elmi-nəzəri əsaslarının, o cümlədən etik prinsiplərinin tədqiqi alim və mütəxəssilərin, xüsusən gənc mütəxəssislərin yaradıcılığının predimetini təşkil etməlidir. Həmçinin miqrasiya prosesinin multikultural cəmiyyətlərin formalaşmasındakı rolu nəzərdən qaçmamalıdır. Bu prosesin də əsas daşıyıcı qüvvəsi məhz gənclərdir. Bu amilin multikultural və tolerant dəyərlərin formalaşmasındakı rolundan savayı ölkəmizin sosial-iqtisadi inkişaf perspektivləri baxımından da araşdırılması önəm daşıyır. Hazırda Avropa ölkələrində miqrasiya prosesi beynəlxalq formada özünü göstərməkdədir. Bəzən cəmiyyətdə emiqrantlarla yerli xalqlar arasında mədəniyyətlərarası çatışma və dözümsüzlük kimi xoşa gəlməyən mənfi hallar da baş verə bilir.

Multikultural cəmiyyətlərin formalaşmasında gənclərin üzərinə düşən əsas vəzifələrdən biri də multikultural və tolerant dəyərlərin mediada təbliğinin davamlı aparılmasıdır. Çünki multikultural dəyərlərin formalaşmasında və təbliğində medianın rolu olduqca böyükdür.

Vüsal Zülfüqarov
Xeberle.com