Azərbaycan Respublikasının Prezidenti yanında Gənclər Fondunun və Azərbaycan Respublikası Gənclər və İdman Nazirliyinin maliyyə dəstəyi ilə Azərbaycan Demokratik Tələbə Gənclər Təşkilatının (ADTGT) əcnəbi gənclərin ölkəmiz, onun çoxmədəniyyətli təcrübəsi, tolerant ənənəsi haqqında məlumat səviyyələrinin yüksəldilməsi, mədəniyyətlərarası dialoq və əməkdaşlıq sahəsində həyata keçirdiyi “Multikulturalizmin Azərbaycan Modeli” Beynəlxalq Gənclər Forumu öz işini Qubada uğurla başa çatdırdı.

ADTGT İctimai əlaqələr və informasiya departamentindən Xeberle.com-a verilən məlumata görə, forum geniş proqrama uyğun fəaliyyətləri ardıcıllıqla 5 gün ərzində əcnəbi və yerli gənclərin fəal iştirakıyla həyata keçirdi.

Rəsmi plenar açılışda Quba rayon İcra Hakimiyyətinin başçısı Mübariz Ağayev, Milli Məclisin deputatları Vahid Əhmədov, Yevda Abramov, Prezident Administrasiyasi millətlərarası, multikulturalizm və dini məsələlər üzrə dövlət müşaviri xidmətinin baş məsləhətçisi Anna Bayramova, gənclər təşkilatları rəhbərləri və digər qonaqlar iştirak edib, öz çıxışları ilə Forumun işini yüksək qiymətləndirdilər.

Forum iştirakçıları Qubada yəhudilərin kompakt yaşadığı Qırmızı qəsəbəyə, Xınalıq kəndinə, Soyqırım Məzarlığına və digər tarixi, mədəni yerlərə səfərlər də etdilər. Forum müddətində əcnəbi gəncləri rayon rəhbərliyi qəbul etdi, Gənclər Mərkəzi ilə tanışlıq oldu, maraqlı konsert proqramı və mədəniyyətlərarası gecə təşkil olundu.

Forum müddətində 4 maraqlı mövzu üzrə panellər təşkil olundu və geniş diskusiyalar aparıldı. Azərbaycanın multikulturalizm modeli və təcrübəsi yüksək qiymətləndirildi və bunun gənclər vasitəsilə dünyaya təbliği təqdir edildi.

Forum öz işini çox əhəmiyyətli Quba Bəyannaməsinin qəbulu ilə başa çatdırıb.

QUBA BƏYANNAMƏSİ

14 – 20 iyul 2014-cü il tarixində Quba şəhərində Azərbaycan Demokratik Tələbə Gənclər Təşkilatının (ADTGT) təşkilatçılığı və Azərbaycan Respublikasının Prezidenti yanında Gənclər Fondunun və Azərbaycan Respublikası Gənclər və İdman Nazirliyinin dəstəyi ilə “bir cəmiyyət – fərqli mədəniyyətlər” devizi altında keçirilmiş “Multikulturalizmin Azərbaycan Modeli” Beynəlxalq Gənclər Forumunda iştirak edən 11 ölkə fəal gənclərinin geniş müzakirələrindən sonra Forum adından bu “Quba Bəyannaməsi” qəbul edilib.

Məlum olduğu kimi, son iki əsrdə bəşəriyyət çoxsaylı kataklizmalar, siyasi çaxnaşmalar, millətlər, xalqlar, cəmiyyətlər, siniflər, ölkələr, dinlər, etnik toplumlar, mədəniyyətlər, məzhəb və qruplararası mübarizələr, müharibələr, münaqişələrdən çox itkilər verib. Bu baxımdan Quba Forumu iştirakçıları olan biz gənclər bu gün, eləcə də gələcəkdə oxşar konfiliktli situasiyaların, münaqişələrin olmaması üçün son vaxtlar dünyanın aparıcı beyin mərkəzlərinin, elm, din xadimlərinin, kulturoloqların, siyasətşünasların təklif etdiyi, xüsusən də Azərbaycanda real nəticələri görünən multicultural tolerantlığı dəstəkləyir, mədəni müxtəlifliyi və dini fərqliliyi alqışladığımızı bəyan edirik. 

Dünyada sivilizasiyaların dialoqu, xalqların qarşılıqlı anlaşması, daha da yaxınlaşması, mədəniyyətlərarası ünsiyyətin sağlam məcrada inkişafı məsələləri olduqca aktuallaşıb. Planetimizin fəal ictimai, yaradıcı, intellektual çevrələri, kreativ gəncləri, vətəndaş cəmiyyəti institutları, aparıcı beyin mərkəzləri çoxdan dərk etməyə başlayıb ki, dünyanın müxtəlif mədəni qütbləri arasında dialoq və anlaşmanın, multikulturalizmin alternativi yoxdur. Bu baxımdan dünyada multikulturalizmin və mədəniyyətlərarası dialoqun rolunun dominantlıq təşkil etməsi və qlobal problemlərin intellektual, kreativ, mədəni, münaqişəsiz, qarşılıqlı anlaşma yoluyla, tolerant müstəvidə həlli olduqca önəmlidir.

Öz növbəsində bu sahədə potensialı və dəyərləri güclü olan ölkələrlə yanaşı, vətəndaş cəmiyyəti nümayəndələrinin, milli-etnik liderlərin, dini icma rəhbərlərinin, siyasi, dövlət, ictimai xadimlərin, xüsusən də gənc nəslin nümayəndələrinin qarşılıqlı dialoq məsələsində təşəbbüs və rolunun artırılması çox məqsədəuyğun hesab olunur.

Quba Forumunun, eyni zamanda oxşar qlobal tədbirlərin təşkil olunduğu məkan kimi son illər xüsusi nüfuz qazanan Azərbaycanın beynəlxalq aləm tərəfindən bu sahədə güclü ənənələrə, təcrübə və potensiala malik ölkə, əsas mədəniyyətlərarası dialoq mərkəzlərindən biri kimi daim tolerant, qarışıq mədəniyyətlərin kəsişdiyi, mədəni və dini dəyərlərin qorunduğu, ksenofobiya, hər növ dini, milli və irqi ayrı-seçkiliyin rast gəlinmədiyi dünyəvi region kimi qəbul olunur.

Azərbaycan Prezidenti cənab İlham Əliyevin başlatdığı "Bakı Prossesi", bu ölkənin irəli sürdüyü, BMT-nin Sivilizasiyalar Alyansı, YUNESCO, Avropa Şurası və ISESCO-nun dəstəklədiyi təşəbbüslə keçirilmiş I və II Ümumdünya Mədəniyyətlərarası Dialoq Forumları, davamlı olaraq təşkil olunan Bakı Beynəlxalq Humanitar Forumları, Azərbaycanda Beynəlxalq Multikulturalizm Mərkəzinin yaradılması qərarı da bunları real sübut edir. Bu təcrübələri isə dünyada yaymaq, təbliğ etmək, qlobal, ictimai-mədəni dəyərlər, multikulturallıq standartlarına çevrilməsinin zamanı çoxdan yetişib.

Belə kontekstdə mədəniyyətlərarası dialoq və multikulturalizm məkanı kimi Azərbaycan Modelinin özünəməxsusluğu, üstünlüyü və dünyaya verəcəyi töhfələr beynəlxalq gənclər sferası tərəfindən ciddi dəstəklənir və təcrübə kimi beynəlxalq qurumlara, müxtəlif ölkələrin hökümətlərinə, dünya ictimaiyyətinə və gənclər qruplarına təklif olunur.

Forum iştirakçıları belə təşəbbüsləri dəstəklədiyini bəyan edərək, sülh şəraitində müxtəlif mədəniyyətlərin birgə yaşayışı, multikulturalizmin, dini-tolerantlığın anlaşılması və münaqişələrin həllində rolu, çoxmədəniyyətli icmalarda gənclərlə iş, onların sosial iştirakçılığının yaymaq, təbliğ etmək, informasiya mübadiləsi aparmaq, gənclər arasında mədəniyyətlərarası dialoqa dair sağlam ünsiyyət və əməkdaşlığı gücləndirmək zəruri sayır.

Forumun yekununda iştirakçılar adından multikulturalizm, mədəniyyətlərarası dialoq və dinlərarası əməkdaşlıqda gənclərin, millətlərin rolunun artırılmasına xüsusi önəm verilməsini tövsiyə edərək Quba Bəyannaməsinin aşağıdakı müddəlarına beynəlxalq ictimaiyyətin, hökumət nümayəndələrinin və vətəndaş cəmiyyəti institutlarının diqqət ayırmasını təklif edirik:

- Gənclər arasında multikulturalizm, mədəniyyətlərarası dialoq və əməkdaşlıq ideyasına dəstək olmaq və onların bu sferada fəal sosial iştirakçılığına çalışmaq;

- Mədəni müxtəlifliyi dərk etmək üçün lazımi bacarıq və biliklərə malik, milli və etnik azlıqlara məxsus gənclər icmalarını fəallaşdırmaq, onlar arasında dinlər, sivilizasiyalar və mədəniyyətlərarası ünsiyyəti və öyrənməni artırmaq;

- Multikulturalizm, mədəniyyətlərarası dialoq və əməkdaşlığın Azərbaycan Modelinin təbliği və gənclər tərəfindən qiymətləndirilməsinin vacibliyini vurğulamaq;

- Müxtəlif regional, milli, bölgə münaqişələri yaranan zaman multicultural dəyərlərdən yararlanmaq üçün beynəlxalq səviyyədə Multikulturalizm və Mədəni Tolerantlıq üzrə Beynəlxalq Gənclər Şəbəkəsinin yaradılmasına start vermək;

- Bu istiqamətdə - multicultural düşüncənin gənclər arasında tanıdılması, təbliği, həyatda tətbiqi yöndə geniş ictimai, mədəni maarifçiliyə başlamalı, layihələr həyata keçirilməli, beynəlxlaq forum və tədbirlərin təşkilini artırmaq vacibdir.

20 iyul, 2014-cü il, Quba şəhəri, Azərbaycan Respublikası