Cəbhə xəttində gedən son  döyüşlərdə qəhrəmancasına  şəhid olmuş kiçik gizir Seymur Baxışov haqqında poema yazılır. "VƏTƏN  SƏNƏ OĞUL DEYİR” adlı  poemanı şəhidin sinif yoldaşı, Azərbaycan Jurnalistlər Birliyinin üzvü, şair-publisist Ərşad NİHAD qələmə alır. Bu barədə Xeberle.com-a yazarın özü məlumat verib: "Orta məktəbdə bir sinifdə oxuduğum,sonrakı illərdə də dostluğu və səmimiyyəti qoruyub saxladığım, Vətən torpaqları uğrundakı 4 günlük (1-4 aprel) müqəddəs savaşda igidliklə vuruşaraq şəhidlik zirvəsinə yüksəlmiş Baxışov Seymur Qulamhüseyn oğlu  haqqında poema yazmaq qərarına gəldim və artıq üzərində ciddi işləyirəm.Yaxın vaxtlarda poemanı yekunlaşdıracam.”
Xeberle.com poemadan bir parçanı oxuculara təqdim edir.

Yurda bir təhlükə, hədə gəldimi,

Bir kimsə əyməsin qəddini gərək.

Zaman yetişdimi, vədə gəldimi,

Düşmənə bildirək həddini gərək.

***

Arxanca dolaşan ölüm kabusu,

On ildə yüz kərə yandan sovuşdu.

Qeyrəti zirehtək geyib əyninə,

Qadadan sovuşdun, qandan sovuşdun.

Bu dəfə Tanrıdan gəlmişdi əmrin,

Şəhidlik şərbətin camda hazırdı.

Hazırdı ən uca zirvəsi ömrün,

Yetəcək olduğun kam da hazırdı. 

*** 

Qartaltək şığıdın düşmən üstünə,

Yetər murdarlandı bu torpaq dedin.

Yağılar birləşib dura qəsdinə, -

Bir daha yenilməz bu bayraq dedin.

Bizə bəs eyləyər bizim olanlar,

Özgə süfrələrdə gözümüz olmaz.

Dünyanı başına eyləməsək dar,

Onda danışmağa sözümüz olmaz.

"Böyük” danışmasın qoy "bala yan”lar,

Haqqın, ədalətin divanı öndə.

Eli viran qoyub, yurd talayanlar.

Görəcək müqəddəs davanı ondə.

***

Beləcə müqəddəs savaşa girib,

Verdin yağıların dərsini, Seymur.

Torpaq hərisini torpağa sərib.

Göstərdin dünyanın tərsini, Seymur.

Vətəndi insana əzəmət verən,

Bitib-tükənməzin, sonsuzun - Vətən!

Vətəndi qoluna güc-qüvvət verən,

İlk sözün Vətəndi, son sözün – Vətən!