Sumqayıt şəhəri 6-mkr, bina 33-ün arxasında yerləşən özəl bağça su idarəsinin məsuliyyətsizliyindən uçmaq üzrədir. 

Redaksiyamıza valideynlər tərəfindən yazılan şikayətdə bildirilir ki, “Lay-Lay” adlı bağça artıq neçə vaxtdır ki, su idarəsinin səhlənkarlığı və diqqətsizliyi üzündən bərbad hala qalıb. Belə ki, binanın yaxınlığında yerləşən su borusunda su boş-boşuna yerə axıdılır. Axan su isə bağçanın zirzəmisinə dolur. Valideynlər onu da qeyd edirlər ki, bağçanın ətrafında suyun dolması nəticəsində antisanitariya vəziyyəti baş alıb gedir. Binanın divarları nəm çəkir və bu da ilk növbədə uşaqların səhhətinə ziyandır. Artıq qorxudan uşaqları bağçaya da apara bilmirik. Bağça müdirəsinə şikayətimizi etsək də, o bildirir ki, mən dəfələrlə aidiyyəti orqanlara demişəm, lakin onlar bu işə məhəl qoymurlar. 

Valideynlərin dediklərinin nə dərəcədə düz olub-olmadığını araşdırmaq üçün yollandıq adıçəkilən bağçaya. Hadisə yerində gördüklərimiz şikayətin doğruluğunu təsdiq etdi. Həmin fotoları sizlərə təqdim edirik. Dəfələrlə Sumqayıt şəhər Su İdarəsinə məsələ ilə əlaqədar zəng etsək də, cəhdimiz uğursuz oldu. Gah qurumun sözcüsü Elnur müəllim telefonumuzu söndürdü, gah da ümumiyyətlə cavab vermədi. Ümüd edirik ki, tezliklə məsələ öz müsbət həllini tapacaq. 

XeberLent.az