Azərbaycan Prezidenti İlham Əliyev Cəbrayıl Rayon İcra Hakimiyyətinin başçısı vəzifəsinə yeni təyinat gerçəkləşdirib.

Modern.az-ın məlumatına görə, ölkə başçısının imzaladığı sərəncamla Kamal İltifat oğlu Həsənov Cəbrayıl Rayon İcra Hakimiyyətinin başçısı təyin edilib.

Xatırladaq ki, Cəbrayıl Rayon İcra Hakimiyyətinin keçmiş başçısı Mahmud Quliyev bu il martın 3-də vəzifəsindən azad edilmişdi.

Yeni icra başçısı Kamal İltifat oğlu Həsənov 2 oktyabr 1957-ci ildə Cəbrayıl şəhərində anadan olub, 1978- ci ildə Azərbaycan Xalq Təsərrüfatı İnstitutunu bitirərək, İqtisadçı ixtisasına yiyələnib.

1978–ci ildən "Azərrabitətikinti” trestinin 6 nömrəli Səyyar Mexanikləşdirilmiş Dəstəsində İqtisadçı kimi əmək fəaliyyətinə başlayıb. 1978-1980-ci illərdə hərbi xidmətdə olub, 1980-1981-ci illərdə Cəbrayıl rayon Aqrar İstehsalat Birliyində təftişçi-mühasib, 1981-1989-cu illərdə Azərbaycan LKGİ Cəbrayıl rayon Komitəsində təlimatçı, şöbə müdiri, 1989-1991-ci illərdə Cəbrayıl rayon XDS İcraiyyə Komitəsində Sosial-hüquq şöbəsinin müdiri, 1991-1993-cü illərdə Cəbrayıl rayon İcra hakimiyyəti başçısı aparatında baş məsləhətçi, 1993-1996-cı illərdə "Çinar” Kommersiya bankında İdarə heyətinin sədr müavini, Sədr, Şuranın məsul katibi, 1996-cı ildən 18.04.2016-cı il tarixədək isə Azərbaycan Respublikasının Mərkəzi Bankında Baş müfəttiş, şöbə müdiri vəzifəsində işləyib.

K.Həsənov 1990-cı illərin əvvəllərində Qarabağda müharibə başlayanda Cəbrayılda könüllülərdən ibarət "Ziyalılar" batalyonunun yaradıcılardından olub.

Prezidentin 18 aprel 2016- cı il tarixli sərəncamı ilə Cəbrayıl  rayon İcra Hakimiyyətinin başçısı vəzifəsinə təyin olunub.