Böyük Vətən müharibəsi illərində Azərbaycan da bir çox igid oğlu ilə fəal iştirak edib. Vaxtaşırı onlar haqqında məlumat verərək onları bir daha ictimaiyyətə tanıtmaq medianın da əsas vəzifələrindən biridir.
Şahbazov Feytulla Xeyirbəy oğlu, baş leytenant, Moskvanın müdafiəçisi. Yəqin çoxumuz bu isim barədə məlumatlı deyilik. Elə isə, gəlin onun həyat və döyüş yolundan qısaca da olsa, məlumatlanaq.
Feytulla Xeyirbəy oğlu Şahbazov 1916-cı ildə Azərbaycanın Xaçmaz rayonunun Ləcət kəndində anadan olub. O, 1939-40-cı illərdə finlərlə müharibənin iştirakçısıdır. Döyüşlərdə əsasən pulemyotçu olub. Böyük Vətən Müharibəsinə də lap əvvəl günlərdən qoşulub. Feytulla Şahbazov 1038-ci motoatıcı alayın 264-cü və 48-ci motoatıcı diviziyalarının tərkibində döyüşüb. Azərbaycanın bu igid oğlu Moskva uğrunda, həmçinin Smolensk, Volokolamsk, Tarutino, Maloyaroslavets ətrafı döyüşlərin fəal iştiakçısıdır. Cəsur pulemyotçu 1941-ci il yanvarın 20-də Smolensk atrafında döyüşlərdə fərqləndiyi üçün ilk mükafatatını "İgidliyiə görə” medalını alıb. Feytulla Şahbazov habelə Voronej və Kursk ətrafı döyüşlərdə də yaxından iştirak edib. Orel şəhərinin azad olunması uğrunda döyüşlərdə göstərdiyi şücaət və igidliyə görə "Qırmızı ulduz” ordeni ilə təltif olunub. O, həm də alman faşistlərindən Stalinqrad, Xarkov, Poltava kimi şəhərlərin azad edilməsi uğrunda döyüşlərin də iştirakçısı olub. Xüsusən 1944-cü ilin avqustunda Riqa şəhərinin azadlığı uğrunda döyüşlərdə silahlı bölmələrə rəhbərlikdə məharətinə, şəxsi şücaətinə görə fərqlənib və Aleksandr Nevski ordeninə layiq görülüb. Sovet Pribaltikasının azadlığı uğrunda döyüşlərin birində yaralanıb. 1945-ci ildə isə ordu sıralarından təxris olunub. 1989-cu ildə doğulduğu rayonda dünyasını dəyişib. Allah rəhmət eləsin!
Bu gün Xaçmaz rayonunda cəsur döyüşçünün anadan olmasının 100 illik yubiley mərasimi keçirilib. Müharibə veteranının doğma və əzizlərinin, rayon və kənd ictimaiyyətinin də qoşulduğu tədbirdə Feytulla Şahbazovun həyat və döyüş yolundan söhbət açılıb, onun əziz xatirəsi yad edilib. Rəsmi hissədən sonra mərasim iştirakçılarına böyük ziyafət verilib.
Cabir Sultanov
Xeberle.com