Bu fotoları musavat.com-a iqtidar qəzetlərindən birində işləyən vicdanlı həmkarım göndərib.
O, bu gün iqtidar qəzetlərindən başqa manşet gözləyirmiş, ancaq gördüyü bunlar olub.
Siz də baxın, əziz oxucular, müharibə aparan, dinc zamanlarda, müharibə ritorikasına dəm verən, erməniləri gecə-gündüz hədələyən dövlət rəhbərlərinin inhisarında olan qəzetlər 15-ə qədər şəhid verdiyimiz gün hansı manşetlərlə çıxıblar.
Gənc əsgərlərin qanının selləndiyi bir vaxtda "Azərbaycan" qəzeti yazır: "Şəmkirçay dəryaçasında işlər yekunlaşmaq üzrədir".
"Yeni Azərbaycan" qəzeti üçün yol məsələsi daha vacibdir: "Ölkənin yol-nəqliyyat infrastrukturu yenilənir".
"İki Sahil" daha mühüm saydığı mövzuda yazıb: "Bakı Xoreoqrafiya Akademiyasının layihələndirilməsinə vəsait ayrılıb".
"Palitra" qəzeti də düşünür ki, Xoreoqrafiya Akademiyası üçün tikiləcək binaya ayrılan vəsait barədə yazmaq daha mühümdür.
Bununla belə, yenə "Səs" qəzeti gündəmə yaxın gəlib: "İlham Əliyev: Biz azərbaycanlılar bütün tarixi torpaqlarımıza qayıdacağıq".
Sizcə, son 20 ilin ən vacib və ən müdhiş xəbərini - cəbhə xəttində atəşkəsin pozulması və 15-ə qədər əsgərimizin şəhid olması barədə manşet xəbəri vermək bu qəzetdə işləyənlərin ağlına gəlməyib?
Əlbəttə, gəlib. Amma əmr yuxarı yerdən gəlib, deyiblər, bu barədə yazmayın. Yoxsa heç ola bilməz ki, bu qəzetlər sözləşmiş kimi 10-cu dərəcəli mövzulara dair manşetlər versinlər.
N.Asifli
