Prezidentə yaxın adamlardan biri o portretə baxaraq heyrətə gəlmişdi. Özü şəxsən sonradan mənə dedi ki, mən o şəkilə baxanda elə bilirdim cənab prezident yanımdadır, yəni canlıdır”. 

  XeberLent.az informasiya agentliyinin bu dəfəki müsahibi özünəməxsus dəst-xəttə, üsluba malik, Azərbaycanda, Dünyanın bir çox ölkələrində kifayət qədər məşhur rəssam, Sumqayıtda ilk özəl şəkil qalereyasının sahibi Namiq Cavaddır.  -     

   Namiq bəy, Rəssamlığa necə gəlmisiniz ?  

  (Gülür) Bu sual məndə uşaqlıq xatirələrimi yada saldı. Uşaq vaxtlarında hamının küçə-bacada oynadığı vaxt, mən evdə şəkillər çəkərdim. Bunu görən valideyinlərim məni oxuduğum 27 saylı məktəbin rəsm dərnəyinə yazdırdılar. Elə bundan sonrada mənim Rəssamlıq yolum başladı.  

  - Elə bir rəssam tapılmaz ki, müəllimi olmasın. Hər halda sizə də istiqamət verən, professionallıq sirrlərini açan müəllimlərin olub?  Bəli, hər kəsin bir müəllimi, ustadı olduğu kimi, mənim də bu yolda irəliləməyimə kömək olan şəxslər olub. Lakin onların arasında ən çox birini qeyd etmək istərdim. O da çox hörmət etdiyim və daima minnətdarlıq bildirdiyim, Telman Yaqubovdur. Telman müəllimdən başqa mən rəssamlığın sirrlərini Əzim Əzimzadə adına rəssamlıq məktəbində və Azərbaycan Pedaqoji Universtetinin bədii-qrafika fakültəsində öyrənmişəm. Ümumilikdə bütün müəllimlərimə çox sağ ol deyirəm, ancaq Telman müəllimin mənim qəlbimdə ayrı bir yeri var.

  - Bir az gələcək planlarınızdan danışın... 

Hal-hazırda özümün rəsm qalereyam var və işlərimi orada davam etdirirəm. Gələcək planlarım çoxdur. Lakin hələ heç birindən söz aça bilmərəm.  - Tələbə necə, heç tələbə yetişdirirsiniz ?  Düzü buna hələ vaxtım yoxdur. Həm də mən kimə gəldi, necə gəldi dərs deyən müəllimərdən deyiləm. Azərbaycanda tələbələrim az olsa da xaricdə var. Sual verə bilərlər ki, niyə bu sənətin sirrlərini öz milətimizin balalarına öyrətmir, xaricilərə öyrədirsən? Onu da qeyd edim ki, mən uzun müddət xaricdə yaşamışam. Ən çox da qonşu Türkiyədə. Bu üzdən orada tələbələrim çoxluq təşkil edib. 

  - Gənc rəssamlara nə demək istəyərsən? 

  Çox gözəl bir sual verdiniz. Ona görə ki, hal-hazırda dünyanın bir çox yerində olduğu kimi, Azərbaycanda da rəssamlıq ölmək üzərədir. Bünün əsas səbəbi müəllimlərdir, ancaq tələbələrin də burada böyük günahı vardır. Hazırki rəssamlar çox tənbəlləşiblər. Onlara tövsiyəm bu olardı ki, öz üzərlərində çox işləsinlər. Əsas iş məktəb və orada tərtib olunan proqramdır. İstər akademiyada olsun, istər də rəsm dərnəyində, əsas proqramla nizamlı dərs alsınlar. Çox acınacaqlı olsa da qeyd edim ki, indi tələbələrə bir-iki dərsdən sonra yağlı boya ilə şəkil çəkdirirlər. Bu da tələbəni öldürmək kimi bir şeydir. Vaxtilə biz, Əzim Əzimzadədə iki ildən sonra yağlı fırça ilə şəkil çəkərdik. İndikilər isə, akademik məktəbi öyrənməmiş öz dəsti-xəttini tapmağa çalışır, məncə bu düzgün deyil.     

    - Ən çox hansı üslubda şəkilləri xoşlayırsınız ?  

Rəssamlıq bir dəryadır və onun bütün növləri gözəldir. Ancaq mən portret janrına üstünlük verirəm.  

  - Vurğuladınız ki, daha çox portret janrına üstünlük verirsiniz. Bəs hansısa məhşurların portretini çəkmisiniz ?         

Təvazökarlıqdan uzaq olsa da qeyd edim ki, bəli, dünyaca məşhur bir çox insanların evində, iş otaqlarında mənim əl işlərim yer alıb. Bunların sırasında Türkiyənin baş naziri Rəcəb Tayyib Ərdoğan, Azərbaycanın sabiq prezidenti Heydər Əliyev, “Doğan” şirkətlər qrupunun rəhbəri Aydın Doğanın ailəsi və sairə. Onu da qeyd edim ki, Türkiyədə adlı-sanlı “Koçaklar” ailəsinin şəxsi rəssamı da mənəm. Ölkəmizin bir çox tanınmış şəxsləri, məmurları və iş adamları mənə müraciət edirlər. Adını çəkməyəcəm, bir dəfə bir iş adamı məndən mərhum Heydər Əliyevin portretini çəkməyimi istədi. Mən də çəkdim. Prezidentə yaxın adamlardan biri o portretə baxaraq, heyrətə gəlmişdi. Özü şəxsən sonradan mənə dedi ki, mən o şəkilə baxanda elə bilirdim ki, cənab prezident yanımdadır, yəni canlıdır. Türkiyədə yaşadığım vaxtlarda Türkiyənin baş naziri Rəcəb Tayyib Ərdoğanın bacanağı Nuri bəylə tanış oldum. O da məndən Baş nazirin portretini çəkməmi istədi və vurğuladı ki, ona pay aparacaq. Mən də şəklini çəkdim və ona təqdim etdim. Bir neçə vaxtdan sonra, Nuri bəy mənə bildirdi ki, cənab Ərdoğanın da iştirakı ilə bir yığıncaq olacaq, gələrsən səni göstərəcəm ki, bəyəndiyin şəklin müəllifi bu insandır. Lakin əfsuslar olsun ki, səhhətimlə əlaqədar tədbirdə iştirak edə bilmədim. 

  - Qeyd etdiniz ki, xaricdə yaşamısınız. Oradakı Rəssamlarla yerli rəssamların səviyyə fərqi necədir və ümumiyyətlə xaricdə başınıza nə kimi maraqlı hadisələr gəlib? 

Türkiyədə Atatürkün əsas portretlərini çəkən Əkbər Yaşılyurd adlı məhşur bir rəssam var. Bütün yüksək çinli məmurların və idarələrin divarlarına asılan Atatürkün şəkilləri ona məxsusdur. Mən də onunla görüşmək üçün həmin qəbula yazıldım və Əkbər Yaşılyurdla görüşdüm. Elə o zamanlar, Atatürkün bir portretini çəkmişdim və istəyirdim ona göstərim. Bir sözlə, görüş vaxtı Əkbər bəyə bildirdim ki, bir rəsmim var, baxarsınız? O da əvvəl rəsmə, daha sonra isə mənə baxaraq bildirdi ki, “bunu sən çəkmisən?” Buyurdum- bəli, necə bəyəm? Bir daha mənə və şəkilə baxdı. Gülərək yenə dedi: “Bunu sən çəkmisən?” Ərz etdim ki, əlbəttə mən çəkmişəm. Əkbər bəy, axı nə olub? Buyurdu ki, gəl ardımca. Məni öz emalatxanasına apardı və Atatürkün bir şəkilini göstərdi və dedi: “Tap görüm bu şəkildə nə çatmır?” Rəssamlar yaxşı bilir, portret çəkən zaman bədənin iki əzasını çəkmək çox çətindir. Biri şəxsin siması, digəri isə onun əlləri. Allaha şükürlər olsun ki, məndə adını çəkdiyim əzaları çəkmək çətinlik yaratmayıb. Bir sözlə, Əkbər bəyin neçə vaxtdır ərsəyə gətirə bilmədiyi şəkili onun gözləri önündə tam hazır etdim və ona təhvil verdim. Həmkarım da mənim bu bacarığımı görərək, mənə yüksək maaşla iş təklif etdi. Ancaq o, bu yaxşılıqların əvəzində məndən şəkillərimin altında öz dəsti-xəttimin olmamasını istədi və mən bir rəssam olaraq bununla razılaşmadım. Şükürlər olsun, sonralar İstanbulda nüfuzum get-gedə artdı və paytaxt telekanalları, qəzetləri məndən müsahibələr alırdılar. Bu günə qədər də əl işlərim dünyanın bir çox yerlərində o cümlədən Amerika , Almanya, Fransa, Hindistan və digər yerlərdə satışa çıxarılır.