Azərbaycan Respublikası Prezidenti yanında Qeyri-Hökümət Təşkilatlarına Dövlət Dəstəyi Şurasının maliyyə dəstəyi ilə "Qadın Təşəbbüsü və Sosial Problemlərin Həllinə Yardım” İçtimai Birliyi may ayının 15-dən "Insan alverinin potensial qurbanlarının maarifləndirilməsi və onlara sosial xidmətlərin təşkili, insan alverinin qurbanlarının sosial reablitasıyasına yardım göstərilməsi” layihəsinin icrasına başlayacaq.

Layihənin əsas məqsədi risk qrpuna daxil olan şəxslərə, insan alverinin qurbanı olmuş qadınlara hüquqi, psixoloji, tibbi və digər xidmətlər göstərmək, qadın alverinin potensial qurbanlarını maarifləndirmək, insan alverinin qurbanı olmuş şəxslərin sosial reablitasiyası üçün tədbirlər icra etməkdir.

Bu məqsədə nail olmaq üçün Mərkəzdə fərdi-psixoloji konsultasiya, sosial-hüquqi xidmətlər təşkil olunacaq. Qurbanların sığınacaq və müvəqqəti yaşayış yeri ilə təmin olunmaları, müəyyən ixtisasa yiyələnmə və işlə təmin olunma sahəsində yardımlar göstəriləcəkdir.

Layihə dövründə əhalinin müxtəlif qrupları arasında sorğular keçiriləcək. Bu sorğular insan alverinin, xüsusi ilə də qadın alverinin mövcudluğuna şərait yaradan hüquqi, sosial və iqtisadi amillərin öyrənilməsinə, bu amillərin aradan qaldırılması yollarının müəyyən edilməsinə yönələcək. Sorğuların nəticələri ümumiləşdirilərək müvafiq qurumlara göndəriləcək.

Regionda traffik ilə bağlı vəziyyətin müzakirəsinə həsr olunmuş dəyirmi masa və təlimlər təşkil olunacaq. Bu tədbirlərdə müvafiq dövlət orqanlarının, ictimai təşkilatların, medianın nümayəndələri iştirak edəcəklər. Tədbirlərdə insan hüquqlarının müdafiəsi sahəsində çalışan qurumların nümayəndələri, praktik hüquqşünaslar, vəkillər iştirak edəcəklər. Təlimlər zamanı qadınlara münasibətdə ayrı-seçkiliyə, zorakılıq hallarına qarşı mübarizənin insan hüquqlarının müdafiəsi aspektində təşkilinin xüsusiyyətləri, forma və metodları tədris olunacaqdır. Həmçinin, Azərbaycanın bütün regionlarında və dünyaya yayımlanan "Dünya” teleradio şirkəti ilə əməkdaşlıq nəticəsində mövzu ilə bağlı verliş hazırlanıb yayımlanacaq.

Layihə çərçivəsində həyata keçirilmiş tədbirlər yerli hakimiyyət orqanlarına, dövlət və ictimai qrumlara bu sahədə mövcud problemlərlə bağlı dəqiq məlumatlar əldə etmək və onlara əsaslanaraq bu problemlərin həlli ilə bağlı öz vəzifələrinin icarsını daha səmərəli qurmaq imkanı verəcək.

Əlaqə ünvanı: Sumqayıt şəh. N.Nərimanov küç. 1-ci mikr, bina 45d.

Telefon: (050) 680 22 22, (050) 300 87 88

Etimad telefonu (018) 642 48 27