I Qarabağ müharibəsi veteranlarını özündə birləşdirən Azərbaycan Vətən Müharibəsi Veteranları Birliyinin sədr müavini Mübariz Quliyev son günlər Ermənistan-Azərbaycan təmas xəttində, cəbhənin müxtəlif istiqamətlərində atəşkəsin çox böyük ölçüdə pozulması, Ermənistan sulahlı qüvvələrinin kəşfiyyat-diversiya qüvvələrinin həmləyə cəhdlər etməsi nəticəsində 9 hərbi qulluqçumuzun şəhid olması, bir neçə əsgərimizin yaralanması hadisəsinə münasibət bildirib. O bu hadisələrin onun doğma kəndi Əlibəylidə də biləvasitə yaşandığını, kənddə sanki atəşkəsdən daha çox müharibə şəraitinin hökm sürdüyünü, habelə yaşadığı Sumqayıtda dünən bir şəhidin dəfn mərasimi keçiriləcəyini qeyd edərək, ermənilərin son təxribatının da bütün Azərbaycanı sarsıtdığını, hər bir soydaşımızın narahatçılıq keçirdiyini vurğulayıb. M.Quliyev bu sarsıntı və narahatçılığı keçirməmizin səbəbi kimi haqqa qovuşan hərbi qulluqçularımızın hər birinin biri bizimçün əziz olduğu, onların həyatdan cavan getmələri ilə bağlı olduğunu deyərək, bununla belə məhz ŞƏHİD olmalarını, Vətən uğrunda həlak olmalarını başucalığı, qürur qaynağı kimi xarakterizə etmişdir:

“…Yəni biz ordumuza güvənirik, cənab Ali Baş Komandanın ordumuzun güclənməsi, müasir silahlarla təchiz edilməsi yönündə ciddi işlərini alqışlayır və bu gücün nəinki Qarabağı, tarixi torpaqlarımız olan Göyçə, Zəngəzur və İrəvanı da azad etməyə yetərli olduğunu bilirik. Biz eyni zamanda dünyada baş verən prosesləri də təhlil edir, Ukraynada, ondan bir neçə il öncə Gürcüstanda, habelə Yaxın Şərq regionunda müşahidə olunan qanlı olayları, qarşıdurmaları izləyirik və görürük ki, dövlətimiz həm ordumuzu gücləndirir, həm də diplomatik fəaliyyəti, xarici siyastətimizi uğurla inkişaf etdirir. Əlbəttə, dövlətin öz vəzifəsi, öz üslubu var, biz veteranların, ictimai qurumların da öz vəzifə və bu vəzifəyə uyğun üslubumuz var. Mən inanıram ki, cənab Ali Baş Komandanımız İlham Əliyevin tarixi əmri əsasında nəinki Silahlı Qüvvələrdə birləşən hərbçilərimiz, eləcə də veteranlar da səfərbər olmağa hazırdır, bütün xalqımız cənab Prezidenti dəstəkləyir və dəstəkləyəcək ki, torpaqlarımız azad olunsun!” M.Quliyev sonda şəhidlərimizin hər birinin ailəsinə, doğmalarına, bütün Azərbaycana və Türk Dünyasına başsağlı diləklərini çatdıraraq, onların qanının yerdə qalmayacağını, şəhidlərin intiqamının mütləq alınacağını bildirib!

Elnur Eltürk, avrasiya.net