Son zamanlar şəhərdə aparılan yenidənqurma, abadlıq işlərini daha əvvəllər nə zaman gördüyümü xatırlamıram. Yəqin ki, şəhərin bu miqyasda yenilənməsi və abadlaşdırılması və ən əsası görülən işlərin şəhər həyatının demək olar ki, bütün sahələrini əhatə etməsi, sistemli xarakter daşıması bütün sumqayıtlıları sevindirir.
Görülən işlərin içində şəhərdəki hündürmərtəbəli binaların fasadlarının rənglənməsi diqqəti cəlb edir. Binaların rənglənməsi işi olduqca keyfiyyətli və normalara uyğun aparılır.(köhnə rəngin təmizlənməsi, sukeçirməz qatın vurulması,astar qat və nəhayət rənglənmə).
Lakin onsuz da əksəriyyəti Sovetlər dönəmində monoton tikililərin birrəngli rənglənməsi şəhərin estetikasına durğunluq gətirə bilər. İndiyədək rənglənən binalarda əsasən eyni rənglərdən və binaların yuxarısında eyni naxışlardan istifadə olunub.
Gəlin dünya praktikasına müraciət edək. Görəsən, qabaqcıl ölkələrdə binaların rənglənməsində hansı trendlər mövcuddur. Çoxmərtəbəli binaların rənglənməsi keçmiş sovetlər ittifaqı tərkibində və habelə "Varşava bloku”na daxil olan ölkələrdə şəhərin memarlıq cəhətdən gözəl olmayan binalarına bir növ yeni nəfəs vermək məqsədilə həyata keçirilib.
Binalar əsasən ya uzlaşan rəng çalarları ya da bəddi rənglənmə üsulu ilə rənglənirdi. Son zamanlar bina rənglənməsində graffiti üslubundan da istifadə edilir. Fikrimcə, şəhərin binalarının rənglənməsində daha çox, şəhər əhalisinə pozitivlik verən rəng çalarları və müxtəlif rənglənmə metodlarından istifadə olunsa, daha yaxşı olar.
Misal olaraq, 14 mərtəbə kimi tanıdığımız binanın xüsusi motivlə rənglənməsi onu Sumqayıtının yeni simvollarına çevirə bilər.(motivlər kimi Qarabağ mövzusu, görkəmli şəxsiyyətlərin portretləri, ölkəmizin simvolları və s istifadə oluna bilər).
Oxucularımızın diqqətinə müxtəlif ölkərədə bina rənglənməsi nümunələrini çatdırırıq.
Çingiz Mustafayev