Sumqayıt gəncləri ictimai həyatın bütün sahələrində fəal mövqeyi ilə seçilir, siyasi, iqtisadi, humanitar, sosial tədbirlərin həyata keçirilməsində yaxından iştirak etməyə çalışırlar. Şəhərin ictimai-siyasi həyatında mühüm rol oynayan həmin gənclərin inkişafında, dünyagörüşünün formalaşmasında onların asudə vaxtlarını necə keçirmələrinin də böyük rolu var.

 

Bəs görəsən sumqayıtlı gənclər asudə vaxtlarını necə keçirir?

Bu mövzuda Xeberle.com saytı kiçik bir araşdırma aparıb. Son illər Sumqayıt şəhərində yeni istirahət obyektləri istifadəyə verilir. Gənclərin əylənməsi və vaxtını səmərəli keçirməsi üçün nəzərdə tutulan məkanlardan biri də dənizkənarı bulvardır. 2 il öncə istifadəyə verilən bulvar artıq gənclərin sevimli məkanına çevrilib. Bulvarda həm uşaqlar, həm böyüklər, həm də gənclər üçün şərait yaradılıb. Yəqin ki, elə bu səbəbdən də gənclər asudə vaxtlarının səmərəli təşkili üçün bu məkana üz tutur, xüsusən axşam saatlarında sərinləmək üçün bulvar gəzintisinə üstnülkü verirlər. Bulvarda həmçinin velosipedçilər üçün xüsusi veloxəttin salınması şəhər gəncləri tərəfindən razılıqla qarşılanır.

 

Bulvarda kafe, restoran, boulinq mərkəzi və digər sosial obyektlər də inşa edilib. Bulvarın sahil zolağı boyunca uzadılması işləri gələcəkdə də davam etdiriləcək. Bundan başqa, gənclər şəhərimizin kafe və restoranlarında, karaoke zallarında istirahət etməyə üstünlük verirlər. Sumqayıtda zövqlə salınmış Heydər Əliyev parkı, Nəsimi parkı, Bələdiyyə parkı, Lüdviqshafen parkı və digərləri sakinlərin və şəhərə gələn qonaqların rahatlığı üçün uyğundur. Bu yaxınlarda Xəzərin Sumqayıt sahilində gəmi gəzintisinin açılışı da hər kəsin ürəyincə olacaq. Lakin Sumqayıt parklarında və bulvarda bir sıra infrastrukturun çatışmaması da təəssüf doğurur. Üstəlik, bəzi gənclər istirahətini əsasən çayxana və qəlyanxanalarda keçirir. Apardığımız real və virtual sorğuların nəticəsində qeyd etməliyik ki, bu gün gənclərimiz Sumqayıtda kinoteatr və AVM (Mall) olmasını daha çox arzulayırlar. Bu obyektlərin çatışmazlığı nəticəsində xeyli sayda gənc asudə vaxtını paytaxt Bakıda keçirməyə üstünlük verir. Ümidvarıq ki, yaxın zamanlarda gənclərimiz üçün Sumqayıtda hər cür şərait yaradılacaq.

 

Sevinc Məhərrəmqızı