Avropa Statistika Bürosu və İspaniya Milli Statistika İnstitutunun təşkilatçılığı ilə İspaniyanın paytaxtı Madrid şəhərində Rəsmi Statistikada Keyfiyyət üzrə Avropa Konfransı keçirilib.  Konfransda Dövlət Statistika Komitəsi sədrinin müavini Yusif Yusifov, Keyfiyyətin idarə edilməsi və metaməlumatlar şöbəsinin müdiri Vüqar Məmmədəlizadə iştirak ediblər.  Bu barədə Xeberle.com-a Dövlət Statistika Komitəsinin Mətbuat xidmətindən məlumat veriblər. 

2001-ci ildən başlayaraq təşkil edilən bu konfranslar müxtəlif sahələrdə çalışan mütəxəssislərlə rəsmi statistikada inkişafa və tərəqqiyə dair müzakirələrin aparılması, ən yaxşı təcrübələrin bölüşülməsi sahəsində əhəmiyyətli rol oynamağa başlayıb. Tədbirdə statistika sisteminin əlaqələndirilməsi, məlumatların keyfiyyətinin artırılması, inzibati məlumatlardan istifadə olunması, keyfiyyətin idarə edilməsi, keyfiyyətlə bağlı ən son standartların və tövsiyələrin mənimsənilməsi, metaməlumatlar sistemi kimi aktual məsələlərlə bağlı müzakirələr aparılıb.

Bununla yanaşı, konfransda beynəlxalq təşkilatlar tərəfindən ötən illər ərzində qəbul edilən metodoloji tövsiyələrin milli statistika təşkilatlarında tətbiqi vəziyyəti, milli statistika sisteminin qiymətləndirilməsi sahəsindəki fəaliyyətlər diqqətə çatdırılıb.

Konfransda rəsmi statistikada keyfiyyətə dair aktual və innovativ mövzulara müraciət olunub, xüsusi sessiyalar təşkil edilib, açıq formada diskussiyalar aparılıb.