Mənzil sahibi olmaq, kirayədə deyil öz evində yaşamaq bugünkü insanların, xüsusən də gənc ailələrin əsas arzularındandır. Bəs mənzil alarkən nələrə diqqət yetirməli, mənzili necə seçməli, hansı xüsusiyyətlərinə diqqət etməliyik?

Hansı xüsusiyyətlərə malik olan mənzil alacağınızı fikrinizdə müəyyən etdikdən sonra mənzilin axtarışına başlamaq olar. Sumqayıtda mənzil axtararkən qarşınızda iki seçim vardır, ya mənzilinizi vasitəçilərin köməyi ilə axtarmalı olacaqsınız, ya da internet üzərindən. Şəhərdə normal fəaliyyət göstərən Əmlak Agentliyinin olmaması, olanların da normal xidmət səviyyəsinə malik olmaması internet üzərindən mənzil axtarışına üstünlük verməyə səbəb olur. Bunun üçün bir sıra internet resursu mövcuddur. Bunların içində isə www.sumqayitda.az əmlak portalı sumqayıtlılara xidmət göstərən hələlik yeganə onlayn resursdur.

Mənzilin axtarılması və muqayisə edilməsi

Axtardığınız parametrləri qeyd edib (otaq sayı, ərazi, qiymət aralığı və s) axtarış nəticələrinə diqqət etməniz vacibdir. Bu yolla siz bazardakı bugünkü qiymət aralığını asanlıqla müəyyən edə, oxşar parametrli mənzilləri müqayisə edə, büdcənizin bazara uyğun olub olmadığını aydınlaşdıra bilərsiniz. İnternet üzərində qiymət araşdırarkən nəzərə alın ki, qeyd edilən qiymətlər son deyil və real alıcı təklifi üçün ciddi qiymət güzəştləri mümkün ola bilir.

Ərazinin seçimi

Mənzil alarkən mənzilin yerləşdiyi ərazinin xüsusiyyətlərini əvvəlcədən araşdırmanız tövsiyə olunur. Sumqayıtda hansı mikrorayon və ya məhəllələrin kriminal durumunun, infrastrukturunun daha pis və ya yaxşı olduğunu yaxın ətrafınızdan soruşmaqla işinizə yardım etmiş olarsınız. Əgər ərazini müəyyənləşdirmisinizsə, mənzilinizin yerləşdiyi binanın mövqeyinə mütləq diqqət edin. Binanın şadlıq evlərinə yaxın olması, həddən artıq yola yaxınlığı, ətrafda yuyucu xidmətlərinin və ya ictimai iaşə obyektlərinin yerləşib yerləşməməsi sizin gələcək mənzilinizdə özünüzü rahat hiss etmənizi şərtləndirən əsas faktorlardır. Bunları nəzərə almasanız, ətrafın səs-küyü, tüstüsü sizi daimi narahat edə bilər.

Binanın layihəsi, mənzilin mərtəbəsi və təmiri

Bəzən bazarda olan mənzillərin qiymətlərinə diqqət yetirdikdəalıcı qeyri müəyyənliklə qarşılaşır.Bəzi satıcılar bilərəkdən va ya bilməyərəkdən satdıqları mənzillərə çox yüksək qiymətlər təyin edərək təcrübəsiz alıcını çaşdıra bilirlər. Bunun üçün alıcılara bəzi məsləhətlərimiz var. Layihə xüsusiyyətlərinə görə ən ucuz mənzillər Xruşşov layihəli, ən baha isə Stalin layihəli binalardır. Orta qiymətlər isə Leninqrad, Daşkənd və Kiyev layihələri binalardakı mənzillər hesab olunurlar. Bundan əlavə, obyekt üçün istifadə oluna bilmirsə, ucuz mənzillər 1-ci və sonuncu mərtəbələr (5 və ya 9) hesab olunur. Birinci və ya sonuncu mərtəbə arasında seçim etməli olsanız seçimi sonuncu mərtəbənin xeyrinə etməniz məsləhətdir.

Mənzilin təmirli olub olmaması qiymətə təsir edən faktorlardandır. Bəzən tam təmirsiz mənzillərin təmirli mənzil qiymətinə təklif olunduğuna rast gəlmək mümkün olur. Bu isə satıcının əmlak dəyərləndirməsindən tam anlayışsız olması deməkdir. Bu uyğunsuzluğu mənzilin təklif olunan qiymətini onun tam sahəsinə bölməklə qismən müəyyən etmək olar. Xruşşov layihəli binalar istisna olmaqla digər layihələrdə əla təmirli mənzilin qiyməti 1 kv m üçün 1000 manat, tam təmirsiz mənzil üçün isə 650- 800 AZN ətrafında olması bugünkü bazar şərtləri ilə hələlik qəbul olunandır. Lakin gələcəkdə bazarın hansı istiqamətə hərəkətlənəcəyini söyləmək olduqca çətindir. 

Əgər bütün bu şərtlər sizi qane edirsə, mənzilə baxarkən diqqət etməli olduğunuz məqamlara nəzər yetirmək olar. Gələcək qonşularınızın kimliyi ilə maraqlanmanız sizi irəlidə üzləşə biləcəyiniz problemlərdən sığortalaya bilər. Bundan əlavə, mənzilə gün vaxtı baxmağınız, baxarkən su, qaz, işıq xətlərini yoxlamanız, döşəmə, qapı və pəncərələrə diqqət etməniz, mətbəxdəki su kranının altındakı dolabı yoxlamanız, habelə divarlardakı və tavandakı ləkə və ya qaralmalara diqqət etməniz vacibdir.

Sənədlərin qaydasında olması

Mənzil alarkən sənədləşməyə xüsusilə diqqət etməniz vacibdir. Mənzilin çıxarışlı olması, çıxarış sənədinin əmlak sahibinin şəxsiyyət vəsiqəsilə tutuşdurulması, mənzildə qeydiyyatda olan insanların sayı və kimliyi, mənzilin ortaq mülkiyyətçilərinin olub olmaması, habelə mənzilin girovda və ya bankda olub olmaması mütləq yoxlanılmalıdır.
Sumqayıtda yeni tikililərdə mənzil qiymətləri yerləşdiyi ərazi, tikinti firması və mənzildən açılan görüntüyə görə 1 kv.m üçün 600-800 AZN arasında dəyişir.
Mənzil alarkən bütün bu sadalanan informasiyadan yararlanmağınız sizə daha yaxşı mənzil seçimi etməyə yardım edəcək.
Çingiz Mustafayev
Xeberle.com