Sumqayıtda “Gənclər Evi”nin istifadəyə verilməsinə az qalıb. Bu Mərkəzin hansı formada idarə ediləcəyi, Mərkəzə ayrıca olaraq rəhbərin təyin ediləcəyi, yoxsa onun idarəçiliyinin şəhər Gənclər və İdman Baş İdarəsinə veriləcəyi hələ dəqiqlik qazanmayan məsələdir. Ancaq Mərkəzə rəhbər təyin olunacağı versiyasına inanıb və maraqlı olacağını nəzərə alıb gənclərin özündən soruşduq ki, görək, onlar öz aralarında kimi “Gənclər Evi”nin rəhbəri görürlər, daha doğrusu, kimi bu vəzifəyə layiq görürlər?

 Respondentlərimizin cavabları bu cür oldu:

 Fərid Ağahüseynov (34 yaş, Sumqayıt şəhər Gənc Müəllimlər Şurasının sədri)

   - Mən, Gənclər Evinin rəhbəri kimi “sumqayitxeber.com” saytının baş redaktoru Eyvaz Qocayevi görürəm. Çünki o, istedadlı və perspektivli gəncdir. Öz işini məsuliyyətlə yerinə yetirən və qarşıya qoyulan məsələləri məsuliyyətlə reallaşdırma qabiliyyəti olan gəncdir. 

Rəhman Rəsulov (27 yaş, “Lider” TV-nin əməkdaşı)

   - Mən bu yaxınlarda istifadəyə veriləcək Gənclər Evinin rəhbəri kimi “Xeberle.com”un redaktoru Elnur Ağayevi görürəm. Onun istedadına və təcrübəsinə bələdəm bir jurnalist kimi…

Elsevər Əliyev (29 yaş, sahibkar)

-       - Bu vəzifəyə heç kimi layiq görmürəm. Çünki gənclərdə idarəetmə bacarığı formalaşdırılmır. 

 Anar Fərəcbəyli (32 yaş, AZTV-nin əməkdaşı)

   - Mən Sumqayıtın bir aktiv gənci olaraq Gənclər Evinin rəhbəri postuna namizəd Elnur Ağayevi görürəm.

Ramil Süleymanov (37 yaş, “Demokratik Gənclər” İB-nin sədri)

   - Mən, bu posta Eyvaz Qocayevi layiq görürəm. Ona görə ki, onun bu sahədə təcrübəsi var və hesab edirəm ki,  bilik-təcrübəsi ilə maraqlı işlər görə bilər. Həm də bitərəfdir və heç bir dövlət idarəsində də işləmir. 

Elşən Allahverdiyev (32 yaş, “168saat.com” xəbər portalının baş redaktoru)

   - Açığı, bu posta namizəd elə özümü görürəm. Öz gücümə və perspektivimə güvənirəm.

Feyruz Şivəxanov ( 49 yaş, Hüquqşünas)

   - Ad çəkməkdə çətinlik çəkirəm. 3-4 nəfər gənc tanıyıram, onlardan da hansının adını çəksəm, o birisi inciyəcək..

“Sumqayitxeber.com”un baş redaktoru Eyvaz Qocayev, amma “Xeberle.com”un baş redaktoru Ramil Zeynallı və “168 saat” qəzetinin baş redaktoru Vüsal Məmmədov da layiqli namizəddirlər. SDGT-nin sədri Ramiz Əliyev çox yaxşı təşkilatçıdır. İsmayıl Kərimov, yəqin gənclik yaşını keçib daha...

Anar Xanlarov ( 32 yaş, “rekord.az” idman portalının redaktoru):

    - Sumqayıtın gənclər təşkilatları, aktiv gəncləri ilə əlaqəm sıx olmayıb. Daha çox “xeberle.com” və “168 saat” qəzetinin uşaqları ilə münasibətim var və hər birini bu yerə layiq bilirəm. Konkret ada gəlincə, Ramil Zeynallının adını çəkərdim. İlk növbədə, insan kimi xarakterini qeyd edərdim. Uzun illərdir bu sahədə çalışır, gənclərlə iş təcrübəsi var, bundan başqa, biliyi-savadı da bu iş üçün yetərlidir. Ən əsası, mən əminəm ki, o insan kimsənin qara qəpiyinə də yan gözlə baxmaz. Ona görə də onun çalışdığı yerdə rüşvət, yeyinti kimi halların baş verməsi mümkünsüzdür.

Ruslan Sabirli (34 yaş, aktyor, “CinemaNews.az” portalının baş redaktoru)

   - Bu posta daha çox namizəd Ramil Zeynallını görürəm. Onun bilik və bacarığına bələdəm. 

Emil Maqalov (37 yaş, Fəal gənc)

   - Gənclər Evinin rəhbəri postuna namizəd kimi YAP-ın Sumqayıt şəhər Gənclər Birliyinin sədri Elmar Məmmədovu layiq görürəm...

Azad Əzizov (24 yaş, fotoqraf)

   - Elnur Ağayevi bu posta layiq görürəm. Başqa namizədim yoxdur. 

Məhəmməd Qiyayi ( 27 yaş, Gənc Təbiblər Şurasının sədri)

   - Mən birmənalı olaraq göstərdiyi fəaliyyətin keyfiyyəti və gənclər sektorunda olan təcrübəsinə əsasən İsmayıl Kərimovu bu mövqedə görürəm.

Ramiz Əliyev (27 yaş, SDGT-nin sədri)

   - Mənim bu posta namizədim yoxdur...

İsmayıl Kərimov (40 yaş, Dövlət İdarəçilik Akademiyasının müəllimi)

   - Mahiyyət etibarı ilə kimin olmasının bir əhəmiyyəti yoxdur. Gənclər Evinin institutlaşması çox vacibdir. Biz nədənsə həmişə bütöv hər hansı bir qrupun potensialını hər zaman şəxsiyyətlərin arxasında gizlədirik. Bu, çox yanlış yanaşmadır. Gənclər sahəsində effektiv nəticələr əldə etmək istəyiriksə, komanda işinin qurulması çox vacibdir. Komanda işini qura bilmirsənsə, ora kim gəlirsə, gəlsin, bu, heç bir şeyi dəyişdirməyəcək. Çünki institutlaşma olmayacaq. Tutaq ki, ən bacarıqlı adamı gətirdiniz, Gənclər Evinin rəhbəri təyin etdiniz. Bir müddət işlədikdən sonra təbii ki, karyerası üçün daha yüksək vəzifələrə gedəcək. Bizdə adətən belə olur ki, bu cür bacarıqlı insanlar getdikdən sonra onun bütün işləri getdikcə yoxa çıxır və yeni gələn yenidən sıfırdan başlayır. İkinci bir məsələ: Gənclər Evinin imkanlarından və çərçivəsindən də hər şey asılıdır. Mənim bu imkan və çərçivələrdən məlumatım yoxdur. Əgər çərçivələr çox dar olacaqsa, orada peşəkar insanın cəlb edilməsi çox çətin olacaq. Sonda kim olacaqsa, bəri başdan ona uğurlar arzu edirəm və ehtiyac hiss edərsə, hər zaman əməkdaşlıq edərək Gənclər Evinin inkişafına töhfə verməyə hazıram.

Üçüncü, bir məsələ inkluzivlik məsələsidir. Yəni Gənclər Evinin idarə olunması, oradakı fəaliyyətlərin tərtibatında və qəraralma prosesində şəhərdəki ictimai-fəal gənclərin rəyləri və fikirləri nəzərə alınacaqsa, bu, çox müsbət bir addım olar. Yox, əgər iştirakçılklıq təmin edilməyəcəksə, Gənclər Evinin gənclər siyasətində töhfəsi elə də ciddi olmayacaq. Dediyim kimi, şəhərdə həyata keçirilən gənclər siyasətinin paradigması gənclərin iştirakçılıq məsələsini həll edən əsas məqamdır. Paradigmada peşəkarlıq önəmlidirsə, Gənclər Evinin idarəolunmasında inkluzivlik vacibdir.

Ceyhun Rasimoğlu (27 yaş, "Səs" Media qrupunun Xəbərlər şöbəsinin müdiri, “Səs” TV-də aparıcı-müxbir)

   - YAP-ın Sumqayıt şəhər təşkilatının Gənclər Birliyinin sədri Elmar Məmmədovu bu posta namizəd görürəm. Çünki onunla yaxından tanışlığım var və gənclər üçün gördüyü işlərin də şahidi olmuşam. İstər layihələr olsun, istərsə də gənclərlə birgə müxtəlif mövzular ətrafında təşkil etdiyi tədbirlər və s. olsun. Hər zaman bu insan bir addım irəlidədir.

Ramil Zeynallı (33 yaş “Xeberle.com” xəbər portalının baş redaktoru)

    - Bildiyimə görə, Sumqayıtda fəaliyyətə başlayacaq Gənclər Evinə rəhbər təyinatı olmayacaq. Sumqayıt şəhər Gənclər və İdman Baş İdarəsi Gənclər evinin fəaliyyətinə nəzarət edəcək.

    Sualınıza gəldikdə isə, ötən il bununla bağlı “Facebook” sosial şəbəkəsində sorğu keçirilmişdi. Sumqayıt gəncləri də bu məsələyə öz münasibətini bildirmişdi.     Mənim fikrimə gəldikdə isə Eyvaz Qocayevin Gənclər Evinə rəhbər təyin olunmasını istərdim.

Vüsal Məmmədov (“168 saat” qəzetinin baş redaktoru)

-         Məncə, legioner cəlb etmək lazımdır.

Elmir Ağayev, 168saat.com