Bakıda özünü yandıran ər və arvadı haqqında bilmədiyimiz faktlar 

Avqust 13-də Sumqayıt şəhər sakinləri Elçin Salahov və onun həyat yoldaşı Jalə Salahova özlərini Prezident Administrasiyasının yanındakı bağda yandırıb. Hər iki şəxs 5 saylı şəhər Klinikasının yanıq şöbəsinə yerləşdirilib.

 Faciəyə səbəb olan ev

Vəziyyəti yerində öyrənmək üçün Salahovların yaşadığı Sumqayıt şəhəri, Hacı Zeynalabdin Tağıyev qəsəbəsi, Kiçik Pereküşkül küçəsi, 24 ünvanına yollandıq.

Yaşadıqları ev qəsəbənin mərkəzindən xeyli uzaqdadır. Sovet vaxtı daha çox rusların məskunlaşdığı bu qəsəbədə indi əsasən azərbaycanlılar yaşayır. Ərazidəki evlərin heç biri nömrələnməyib. Balaca və qısa dalanlar arasında Salahovların mənzilini birtəhər tapdıq.

Məsələnin mahiyyəti

Köhnə, təmirsiz, şəraiti olmayan 2 otaqlı evdə yaşayıb Salahovlar ailəsi. Bir həyətdə 3 ailə yaşayır. Qapısına qıfıl vurulub. Evin pəncərələri şüşədən başqa hər şeylə bağlanıb. Kardon, qırıntı taxtalar və s. Qonşu Babayev Abbasmirzə ilə söhbətləşdik. Məlum oldu ki, bu ev onların arasında böyük davaya səbəb olub. Elə Salahovların özünü yandırmasının da səbəbi A. Babayevlə 9 il davam edən məhkəmənin onun lehinə qərar çıxartması olub.

Babayevin sözlərinə görə, bu ev əzəldən onun ata mülkü olub: “Ümumi həyət 1965-ci ildən atam Babayev Babaya məxsusdur. Onun vəfatından sonra anam Pərvanə xanımın adına qeydiyyatda olub. 1993-cü ildə isə qardaşım Babayev Abuzər, bacım Babayeva Giləxanım və mən olmaqla 3 nəfərin arasında miras kimi bölünüb”.

“Elçinin bacanağı onu aldadıb, aradan çıxıb”

A. Babayevin dediyinə görə, Elçin evi onun qardaşı Abuzərdən alıb. Abuzərlə Elçin həm də bacanaqdır: “Mən Rusiyada olanda qardaşım Abuzər bütün həyəti öz adına keçirib. Öncə evi bacım qızına satıb. Adına heç bir sənəd də verməyib. Ondan sonra isə bacanağı olan Elçinə 7500 manata bu evi verib. Heç birimizin xəbəri olmadan. Məni də dəlixanaya basdırıb ki, imza sahibi olmayım. Özü də aradan çıxıb. Rusiyaya qaçıb. Onu yola salan da bacanağı Elçin olub”.

Əvvəlcədən xəbərdar olunub

Giləxanın Babayeva deyir ki, Elçin Salahova bu evin başqa birisinə satıldığı bildirilib: “Mən Sumqayıtda qızımla yaşayırdım. Elçinin də qohumları qonşum idi. Xəbər mənə gəlib çatanda onları xəbərdar etdim ki, o evi almasınlar. Həmin ev mənin qızıma bir il bundan qabaq satılıb. Hələ də sənəd ala bilmirik. Nə olsun Abuzər qardaşımdı?! Mənim şikəst qalmış qızımı belə aldadıb”.

***

Abbasmirzə Babayev deyir ki, Ruhi-əsəb dispanserindən çıxan kimi Elçinə vəziyyəti yoluna qoymaq üçün təklif verib, ancaq o razılaşmayıb: “Məcbur qaldım məhkəməyə müraciət edim. Əvvəl dedim ki, gəl mənimlə əlbir ol, qardaşım Abuzəri məhkəməyə verək, onu çağıraq Bakıya. Sən pulunu ondan al, ya da razılıq verərəm, qardaşımın payına düşən evi 2 yerə böləsiniz. Çünki o ev səndən öncə bacım qızına da satılıb. O isə mən dediklərimə məhəl qoymadı. Səbəb yəqin onun Abuzərlə bacanaq olması idi. Mən də məhkəməyə verib, onların qeydiyyatını ləğv etdirdim”.

İnsident böyüyür

Abbasmirzə ilə Elçinin arasında bir neçə dəfə insident olub. Bir-biri ilə az qala əlbəyaxa davaya qədər gedib çıxıblar. Polis və digər orqanların da bundan xəbəri olub: “Bir neçə dəfə mənə sataşıb ki, onu vurum, məni polisə versin. Amma mən bunu eləmədim. Son vaxtlar həyəti çox zibilləyirdi. Nə zibili olurdu, tökürdü həyətin içinə. Ağacları yandırırdı. Buna görə mən bir neçə dövlət qurumuna şikayət etmişəm. Aralarında razılaşıblar deyə, buna da məhəl qoyan olmadı. Elə olurdu ki, həyətə köynəksiz çıxırdı. Eyni həyətdə qalırdıq deyə, buna etiraz etdim. Aramızda ciddi söhbət oldu. Camaat zorla ayırdı. Yoxsa əlimdən bir qəza çıxardı...”

Məhkəmənin qərarı: Evdən çıxarılsın

Sumqayıt şəhər məhkəməsinin 29 may 2012-ci il tarixli 2-707 saylı qətnaməsi ilə Elçin Salahov və Abuzər Babayev arasındakı 2006-cı ildə bağlan ev alqı-satqı müqaviləsi etibarsız sayılıb. Bundan sonra Elçin mülkiyyət hüququnu itirəndən sonra məhkəməyə müraciət edərək, ödədiyi məbləği tələb edib. Məhkəmə məsələyə baxıb və qərar verib ki, Abuzər Babayev Elçin Salahova dəyən ziyanı ödəməlidir. Amma ortalıqda nə pul var, nədə ki, Abuzər Babayev.

Hadisə ilə bağlı məhkəmə prosesi uzun müddətdir davam edir. Qərar isə dəyişməyib...

Sonuncu məhkəmə prosesi 1 avqust 2014-cu ildə hakim Elman Məmmədovun sədrliyi ilə Sumqayıt şəhər məhkəməsində keçirilib. Abbasmirzə Babayevin iddiası ilə keçirilən məhkəmə cavabdeh Elçin Salahovun evdən çıxarılması barədə iddianı təmin edib. 

Qadının bədəninin 45 faizi yanıb

 Lent.az-ın əməkdaşı xəstəxanada olub və özünü yandıran ər-arvadın vəziyyəti ilə maraqlanıb.

Elçin Salahovun vəziyyəti normaldır, artıq palataya köçürülüb. Onun bədənin 22-23 faizi yanıb. Ayaqlarında və qarnında yanıq xəsarətləri var. Yoldaşı Jalə Salahovanın vəziyyəti isə hələ də ağırdı. Reanimasiya şöbəsində olan qadının bədəninin 45 faizi yanıb və həyatı üçün təhlükə sovuşmayıb. Xəstəxanada onu da öyrəndik ki, ailəsini qəbir daşı yonmaqla dolandıran E. Salahovun 5 yaşlı bir qız övladı var. Xanımı Jalə Salahova isə evdar qadındır. Hadisədən bir gün əvvəl onlar qızı xalasının evinə aparıblar və hazırda orada qalan qızcığaz valideynlərinin başına gələnlərdən xəbərsizdir.

“Əvvəlcədən əlbir olub, məni aldatdılar”

Qayıdaq mülk mübahisəsinə. Elçin Salahov deyir ki, onun ev üzərində qanuni mülki hüquqları var: “Mən qanuni sənədlə, notariusun təsdiqi ilə ev almışam. Notariat dövlət idarəsidir. Öz adıma “qupçam” var. Alqı-satqı haqqında müqaviləmiz belə var. Məhkəmə həmin alqı-satqı müqaviləsini ləğv edir. Burada məhkəmənin maddi-marağı var. Həmin Babayevlər ailəsi dələduzdurlar. Onlar da belə aldatmalar gəlir mənbəyidir. Onların iddia etdiyi məsələlər hamısı yalandır. Heç kim mənə deməyib ki, o evi bacısı qızına satıblar. Oranı alanda hamısı orda idi. Bir xaricdə da olan qardaşı bir də Abbasmirzə yox idi. Həmin Abbasmirzə dəlixanada idi. Mən evi aldım, sənədləşdirdim, bacanağım Rusiya köçdü. Elə o günün səhəri dəlixanadan çıxıb gələn Abbasmirzə başladı mənimlə bu evin söhbətini eləməyə. Mən nə qədər evi pulu ilə, razılıq ilə aldığıma çalışsam da o  məhkəməyə verməklə hədələdi. Verirsə versin, mən 7500 manat pul vermişəm.    Rəsmi qeydiyyatım da var. Məhkəmənin nə maddi-marağı var bilmirəm, amma məni qeydiyyatdan çıxartdı. Məhkəmə mənə pul kəsdi. Həmin qərar görə, mənə qismən pul kəsdi. Abuzər Babayev tərəfindən 14 min manat mənə ödənilməlidir. Nə polis nə də digər orqanlar onu tapa bilmir. Amma onu Azərbaycanda görənlər də var”.

E.Salahov bildirir ki, məsələyə bağlı hər yerə şikayət ərizəsi verib. “ Kənd Təsərrüfat Nazirliyi ilə Rabitə və İnformasiya Nazirliyindən başqa bütün orqanlara müraciət etmişəm. Amma heç kim mənim şikayətimə baxmır. Yola verirlər”.

“5 yaşındakı qızımı polisə verib”

Tərəflər arasındakı münaqişə tək mülk alış-verişi ilə bitmir. E.Salahov deyir ki, dəfələrlə ondan Sumqayıt şəhər 2-ci polis bölməsinə məni şikayət ediblər: “Hətta bir dəfə mənim 5 yaşlı qızımı da polisə veriblər. Həyətdə mən olmayanda evimin qabağını özü zibilləyir, pis günə qoyur. Sonra yalandan gəlib üzümə durur ki, sən və uşağın eləyib. Bilirsiniz, onlar yedikləri yeməyi belə mağazalardan nisyə alıb, atırlar. Fırıldaqdırlar, mənim kimi hamını elə aldadırlar. Ümumiyyətlə dələduzluqla yaşayırlar. Evimin arxasında da bir ev var. Onları da aldadıb oranı satıblar. Heç onların bir dənə də olsun sənədi yoxdur. İndi Dövlət himayəsindəyəm. Məsələyə Baş Prokurorluq baxır. İnşallah hər şey öz yerini tapacaq ” .

Elçin Salahov Qarabağ qazisidir

E. Salahov 1993-cü ildə 18 yaşında ikən cəbhəyə gedib və 4 il Tərtər istiqamətində döyüşüb. Bir neçə dəfə yaralanıb, lakin bütün sənədlərini cəbhədə itirdiyindən bu günədək heç bir yardım və müavinət ala bilməyib. 

Salahovun komandiri “Qarabağ müharibəsi əlilləri, veteranları və şəhid ailələri ictimai birli”in sədri ehtiyatda olan polkovnik Mehdi Mehdiyev Lent.az-a açıqlamasında Elçini tərifləyir və onu nizamlı əsgər kimi qələmə verir: “ Bütün əmrləri vaxtında yerinə yetirib. Özünü bütün komandir heyətinə sevdirib. Nə kobud, nədə  artıq hərəkəti olmayıb. Ona görə, mən bu gün inana bilmərəm ki, Elçin kiməsə gedib sataşa və yaxud başqa əməl edər. Özü də maddi vəziyyətinin yaxşı olmadığı bildiyimdən, əminəm ki, o əvvəlcədən məsələnin belə qarışıq olduğu bilsəydi, ona getməzdi. Həm də belə bir anlayış da var müharibə sindromu. Almaniya, Amerikada və digər inkişaf etmiş ölkələr də müharibə keçmiş hərbi qulluqçu ilə, uzun müddətli iş aparırlar. Buna səbəb isə, müharibədə yaranan beyindəki gərginliyi aradan qaldırmaqdır. Bu Elçin də müharibə dövründə ciddi sinir sisteminə zərər dəyib. Müəyyən həddə qədər özünü cilovlayıb, amma hədd aşanda psixoloji partlayıb. Ani özlərini itirmək dərəcəsinə çatıb”.

Qeyd edək ki, Salahovlar ailəsinə Sumqayıt şəhər İcra Hakimiyyəti və digər qurumlar maddi kömək edib. İndi onlar evin xanımı Jalənin sağalmasını və bu məsələlərin tezliklə həll olunmasını gözləyirlər.