Son illər Sumqayıt şəhərində bir sıra uğurlu layihələr icra olunub; bir çox şəhər əhəmiyyətli yeni obyektlər tikilib, binaların fasad və damları yenilənib, meydanlar salınıb, parklar, küçələr, yollar təmir olunub, yeni abidələr hazırlanıb. Hər il olduğu kimi, 2014-cü ildə də Sumqayıt şəhərində bir çox layihələr həyata keçirilməkdədir.

 Bunlardan Xocalı abidəsini və 20 yanvar abidə kompleksini göstərmək olar. Sumqayıt sakinləri dəfələrlə bu abidələrin yaradılması təklifi ilə çıxış ediblər. Bu layihələr şəhər ictimaiyyətinin dəfələrlə müzakirəsinə çıxarılıb və bəyənilib. Bu abidələr şəhidlər xiyabanının girəcəyində yaradılır. Artıq 20 yanvar abidəsi demək olar ki, hazırdır və tamamlanma işləri gedir.

Yüksək zövqlə tamamilə ağ mərmərdən hazırlanan 20 yanvar abidəsi Obelisk memarlıq abidəsini xatırladır. Qeyd etmək lazımdır ki, Obelisk qədim Misir memarlığının əsas elementlərindən biri olub atəşi simvolizə edib. Bundan Qədim Romada da istifadə olunub. Hazırda bu formada dünyanın demək olar ki, bir çox yerlərində abidələr ucaldılıb. Türkiyədə İstanbul şəhərində Göy məscidin ətrafında Obelisklər mövcuddur. Bakıda İstiqlaliyyət küçəsində də ucaldılan abidəni misal gətirmək olar.  İnanırıq ki, burada yaradılan kompleks şəhidlərimizin ruhuna böyük ehtiram əlaməti olmaqla yanaşı şəhərimizinn memarlıq görünüşünü daha da zənginləşdirəcəkdir.