Bir qrup Sumqayıt sakini modern.az saytına məktub göndərib. Onlar saytın fəal oxucuları olduğunu söyləyib və kömək istəyiblər.

Sumqayıt sakinləriyik. 4-cü məhəllədə yaşayırıq. Şəhərin İcra Hakimiyyətindən məhləmizi 200 metr məsafə ayırır.  Bu ilin soyuq qışını çox çətinliklə keçirdik. Məhəlləmizdə yaşayan təqaüdçülər  aldıqları kiçik pensiyaları ilə otaqlarını qızdırmağa məcbur oldular. Çünki məhləmizin istilik sistemi yoxdur.  Binaların giriş və çıxış qapıları, pəncərələri yoxdur. 25 ilə yaxındır ki, bu məhəllədə bir dəfə də olsun abadlıq işi aparılmayıb. Vəziyyətimiz çox gərgindir. Artıq neçə illərdir ki,  bizim məhəllənin yaşıllıq zolaqları da quruyub gedib. Olan zolaqlara da tamet daşları düzüb, ağaclatrın inkişafına mane olurlar.

Hər il olduğu kimi, bu il də bir dəfə də olsun  məhəllənin kənar yollarında olan ağaclara bir içim su verilmədi. Bəs bu şəhərin Yaşıllaşdırma və Su idarələri suyu nəyə sərf edirlər? Bir dəfə də olsun ağacların dibi bellənməyib...

Bu ilin fevral ayında  şəhər icra hakimiyyətinin səlahiyyətlisi Tariyel Hacıyevin imzası ilə aldığımız vəd verən amma hələ də əməl olunmayan məktubu sizə də təqdim edirik. Hətta bu məktubdan sonra da məhəlləmizin bərbadlığı ilə maraqlanan olmadı. Bu məhəllədə heç bir avtomobil yolu yoxdur.  İnsanların min bir əziyyətlə aldıqları maşınları,  məhəllədaxili yollarda çökəklərə düşərək sıradan çıxır. Azərbaycan Respublikasının hörmətli prezidenti cənab İlham Əliyev şəhərlərin, eləcə də Sumqayıtın abadlaşdırıması üçün  dəfələrlə bu şəhərə milyonlarla vəsait ayırır. Niyə o vəsitdən  10 minə qədər əhalisi olan 4-cü məhəlləyə çatmır? Biz də sivil Azərbaycanın sivil qanunları ilə, gözəl şəraitdə yaşamaq istəyirik. Bəlkə şikayətimizi Siz lazımi ünvanına çatdırasınız...

 Sizdən kömək gözləyən, 4-cü məhəllənin sakinləri.