Sumqayıtda Yaşma bağlarının sakinləri belə isti havalarda bağda olsalar da, kölgəsində oturmağa bir ağac tapmırlar. Səbəb isə əkdikləri ağacların susuzluqdan qurumasıdır. Şikayətçilər deyir ki, yaz aylarında kanaldan, arxdan su daşıyıb istifadə edirdik. İstilər başlayandan ona da həsrət qalmışıq. Şikayətçiləri ən çox yandıran isə susuzluq deyil. Yolboyu uzanan və onlara gözdağı olan bu su borularından gəlməyən suyun haqqını ödəmələridir. Çünki ödədikləri məbləğin müqabilində onların suya olan ehtiyacı qarşılanmır.

Sakinlərin şikayətlərilə bağlı Dalğa Bağlar cəmiyyətinin sədri Cəmaləddin Məmmədovla əlaqə saxladıq. Qurum rəsmisi müsahibə verməsə də, şifahi olaraq bildirdi ki, Yaşma bağlarına verilən su Samur çayından götürülür. Samur çayı isə Rusiya Federasiyasından gəlir və şimal bölgəsində olan 6-7 rayondan keçir. Həmin rayonlar da bu çayın suyundan istifadə etdiklərindən Yaşmaya gəlib çatana qədər su tamamilə azalır.

Amma Yaşma bağlar massivinin sakinləri üçün ürəkaçan xəbər var. Cəmaləddin Məmmədov söz verdi ki, həftə sonu alternativ kanalla gələn su anbarda toplanıb əhaliyə veriləcək. Həm də fasiləsiz. Hər halda uzun müddətdir ki, susuzluqla mübarizə aparan sakinlər həftəsonuna qədər də gözləyər. Təki su həsrətlərinə son qoyulsun. (ANS TV)