Afrikanın bir neçə ölkəsində yayılan və artıq sərhədləri aşan dəhşətli Ebola virusu ilə bağlı təşviş artır. 

 Ümumdünya Səhiyyə Təşkilatının (ÜST) son məlumatına görə, Ebola qurbanlarının sayı artıq 1100 nəfəri ötüb. Ölümcül virusa yoluxanların sayı isə 2000-ə yüksəlir.

Artıq bütün dünya Ebolaya qarşı səfərbərlik elan edib. Azərbaycanın Səhiyyə Nazirliyi də Ebola virusu ilə bağlı mübarizəyə qatılıb. Səhiyyə nazirinin müavini Abbas Vəlibəyov Ebola virusu ilə bağlı əmr imzalayıb.

Virusun qarşı profilaktik və əks-epidemik tədbirlərin gücləndirilməsi, eləcə də bu xəstəliyin ölkəyə keçməsinin qarşısının alınması məqsədi ilə tədbirlər müəyyənləşdirilib. Ebolaya yoluxmaqda şübhəli bilinən şəxslər Elmi-Tədqiqat Ağciyər Xəstəlikləri İnstitutunda yaradılmış xüsusiləşdirilmiş şöbəyə yerləşdiriləcək.

Virtualaz.org saytının müxbirləri bu dəhşətli virusun Azərbaycana keçmə ehtimalını və xəstəliklə mübarizə üçün xüsusiləşdirilmiş şöbədə yaradılmış şəraitli yerindəcə öyrənib.

Qeyd edək ki, 8 palatadan ibarət şöbə 2006-cı ildə yaradılıb. Şöbənin müdiri Sevda Mustafayevanın sözlərinə görə, şöbə yenidən qurulub və artıq virusa yoluxan bütün xəstələri qəbul etmək üçün şəraitləri var.

“Bu şöbədə ilk dəfə “quş qripi” virusuna yoluxan xəstələri müalicə etmişik. Sonradan “donuz qripi” virusuna yoluxmaqda şübhəli bilinənlər də şöbəyə yerləşdirildi. 2008-2009-cu ildə xəstələrimiz olub. Lakin son illər ölkədə epidemioloji vəziyyət sabit olduğundan xəstə qəbul etməmişik” - deyə S.Mustafayeva virtualaz.org saytına açıqlamasında bildirdi.

Şöbədə hər palataya bir çarpayı qoyulub. Geyinib-soyunma, sanitar qovşaq ayrıdır. Palataların qapıları və burada quraşdırılan aparatlar da diqqət çəkir. Şöbə müdiri deyir ki, xəstələrin ətraf mühitdən təcrid edilməsi üçün süni ventilyasiya aparatı quraşdırılıb. Bundan əlavə, hər palatada süni nəfəs aparatı var. Ayrıca palatalarda monitorlar və xəstəyə nəzarət edəcək aparatlar qoyulub.

S.Mustafayeva hava-damcı yolu ilə keçən təhlükəli viruslara yoluxmuş xəstələrin müalicəsi üçün dərmanla təchiz edildiklərini söylədi: “Bu şöbə ağır və yüksək patagen viruslar üçün nəzərdə tutulub. Burada hava-damcı yolu ilə ağır viruslara yoluxanları müalicə edirik. Doğrudur, hələlik Ebola virusuna qarşı vaksin və ya hansısa dərman yoxdur. Lakin biz qabaqlayıcı tədbirləri görürük, hər ehtimallara hazırlaşırıq”.

Bəllidir ki, Ebola xəstələrlə təmas nəticəsində yayılır. Bir çox həkimlər Ebolaya yoluxanları müalicə etməkdən imtina edib. Amma xüsusi şöbədə çalışanların Ebola qorxusu yoxdur.

Bunu da Sevda Mustafayeva deyir: “Bizim şöbədə həkim və tibb bacılarından ibarət 10 işçimiz var. Burada çalışanlar xüsusi təlimlər keçiblər, onlara viruslu xəstələrə qulluq qaydaları öyrədilib. əməkdaşlarımız xüsusi təhlükəli virusdan qorunma yollarını bilirlər. Xəstənin təmasda olduğu əşyaların dezinfeksiyası, yataqların dəyişdirilməsi, təmizlənməsi qaydalarını öyrənmişik, amma daim məlumatları yeniləyirik.

Bundan əlavə, Səhiyyə Nazirliyi şöbəni xüsusi geyimlər, maskalar, eynəklər , dezinfeksiya aparatları, dərmanlarla təmin edir. Ebolaya yoluxduğu ehtimal edilən xəstələrə sintomatik yardımlar edilməsi üçün bütün dərmanlarımız var”.

Virusun qeydə alındığı ölkələrə səyahət edən və ya belə xəstələrlə təmasda olanlar mütləq həkimə müraciət etməlidir.

Şöbə müdiri dedi ki, yüksək hərarət virusa yoluxmanın ilk göstəricisi ola bilər: “Xəstəliyə yoluxanlarda yüksək hərarəti, əzələ-sümük ağrısı, ürəkbulanma, qusma, ishal, bədəndə suyun tükənməsi müşahidə edilir. Qanda və digər orqanlarda dəyişikliklər olur. Amma xarici ölkələrə səyahət etməyənlər, belə xəstələrlə kontaktda olmayanlar narahat olmamalıdır. Bizə gətirilən xəstələr laboratoriyada müayinə olunurlar. Amma kəskin virus infeksiyalarının müayinəsi üçün analizlər  Respublika Taun Əleyhinə Stansiyaya göndərilir. Bizim şöbənin xüsusi konteynerləri var. Stansiyaya göndərilən qan və ya digər analizlər xüsusi qablarda daşınır. Yenə də qeyd edim ki, narahatçılığa əsas yoxdur, Azərbaycanda Ebola virusuna yoluxma qeydə alınmayıb”.

Şöbə müdiri Ebolaya yoluxanlar arasında ölüm faizinin yüksək olmasını xəstəliklə mübarizə aparılan ölkələrin həyat səviyyəsi ilə bağlı olduğunu da dedi: “Ebola virusu ilk dəfə Afrika ölkəsində aşkarlanıb. Virusun meymun və yarasalardan insana keçdiyi deyilir. Lakin xəstəliyin ən riskli tərəfi Ebolanın insandan insana yoluxmasıdır. Virus qan, nəcis, sidik və digər ifrazatlarla yayılır. Amma virusa yoluxanların sağalma ehtimalı da var. Sadəcə olaraq xəstəliyin erkən dövrdə aşkarlanması və müalicə məqsədilə görülən tədbirlər rol oynayır. Ümumiyyətlə, təkcə Ebola virusu ilə bağlı vəziyyət deyil, digər viruslar da göstərdi ki, xəstəliklərlə mübarizədə ölkələrin yaşayış səviyyəsi, tibbi inkişafı, müalicənin effektliyi öz təsirini göstərir. Azərbaycan səhiyyəsi inkişaf edib, istənilən xəstəliklə mübarizə imkanlarımız var, dərmanlarla təminat yüksək səviyyədədir. Amma ölüm faizi yüksək olan ölkələrin səhiyyəsiunin inkişafı göz önündədir”.

S.Mustafayevanın fikrincə, Ebola ilə bağlı təşvişə əsas yoxdur: “İstənilən virusun yayılmasının qarşısını almaq üçün profilaktik tədbirlər görülür. Ebola virusunun Azərbaycana keçmə ehtimalı yoxdur. Buna baxmayaraq Səhiyyə Nazirliyi tədbirlər görür. İnsanlar yalnız Ebolaya görə deyil, adi qripdən də qorunmalıdır. Bunun üçün şəxsi gigiyenik qaydalara əməl etməlidirlər. Əllərin gigiyenası və təmizliklə xəstəliklərdən qorunmaq mümkündür”.(virtualaz.org)