Avqustun 26-da Sumqayıt şəhərinin Corat qəsəbəsində yeni özəl uşaq bağçası istifadəyə verilib. İkimərtəbəli binada 80 uşağın təlim-tərbiyəsi üçün hər cür şərait yaradılıb.

AzərTAc xəbər verir ki, açılış mərasimində çıxış edənlər son illər respublikamızda yüzlərlə uşaq bağçasının, uşaq evinin tikilməsinin, bir çoxunun isə yenidən qurulmasının ölkədə uşaqlara göstərilən diqqət və qayğının mühüm tərkib hissəsi olmaqla yanaşı, həm də Azərbaycanın gələcəyinin daha etibarlı təminatına geniş imkanlar açdığını vurğuladılar. Bu işdə Heydər Əliyev Fondunun fəaliyyəti danılmazdır. Fondun bu sahədə keçirilən dövlət siyasətinə verdiyi dəstək və onun təşəbbüsü ilə tikilən yeni bağçalar Azərbaycan ictimaiyyətinin böyük rəğbətinə səbəb olub.

Çıxışlarda qeyd edildi ki, bu gün Heydər Əliyev Fondu Azərbaycanın hər yerində olduğu kimi, Sumqayıtda da irimiqyaslı layihələr həyata keçirir. Bildirildi ki, təhsil sahəsində qazanılan uğurlar məktəbəqədər təhsildən başlayır. Məktəbəqədər təhsil uşaqların intellektual, fiziki və psixoloji inkişafında, potensial imkanlarının üzə çıxarılmasında mühüm rol oynayır.

Sonra bağça ilə tanışlıq oldu. Burada uşaqların asudə vaxtlarının səmərəli təşkili üçün idman və oyun zalları, attraksionlar yaradılıb, maraqlı və rəngli lövhələr hazırlanıb, açıq havada istirahət üçün yerlər ayrılıb. Müxtəlif yaşlı 4 qrup üçün nəzərdə tutulan bağçada yataq, yemək, dərs, musiqi, rəsm otaqları mövcuddur. Otaqlardakı ekoloji cəhətdən təmiz materiallardan hazırlanan oyuncaqlar və dərs ləvazimatları bütün sanitar-gigiyenik norma və standartlara cavab verir.

Uşaq bağçasında 2 yaşından 5 yaşınadək olan uşaqlara təhsilin ilkin mərhələsi ilə yanaşı, rus və ingilis dilləri də tədris ediləcək. Uşaqlara burada rəqs və musiqi də öyrədiləcək.

Tədbir zamanı balaca fidanlar da öz sevinclərini gizlətmədilər. Onlar bir-birindən gözəl şerlər, rəngarəng musiqi nömrələri səsləndirdilər.