Artıq yeni tədris ilinin başlanmasına sayılı günlər qalıb. Tətil zamanı ölkənin bir sıra bölgələrində istifadəyə yararsız olan orta məktəblər və digər təhsil müəssisələri təmirə bağlansa da onların bəzilərində görülən işlər hələ də başa çatmayıb. 

Nümunə üçün qeyd edək ki, Sumqayıt şəhərindəki 18 və 11 nömrəli orta məktəblərdə təmir işləri yekunlaşmayıb. Çox güman ki, ilk dərs gününə kimi məktəblərin istifadəyə verilməsi mümkün olmayacaq. Bu səbəbdən adlarını qeyd etdiyimiz məktəblərin şagirləri böyük ehtimalla müvəqqəti başda təhsil müəssisələrində yerləşdiriləcəklər. Bu kimi problemlər ölkənin digər rayon və şəhərlərində də mövcuddur.

Mətbuatda yer alan digər məlumata görə, Mingəçevir şəhərindəki 4 saylı orta məktəbdə təmirin başa çatdırılmaması sakinlərinə narazılığına səbəb olub. 

AzVision.az məsələ ilə bağlı Təhsil Nazirliyindən münasibət öyrənib. Nazirlikdən bildirilib ki, Təhsil Nazirliyinin sifarişi ilə təmir olunan və tikilən məktəblər istifadəyə verilib: 

“2014-cü ildə Təhsil Nazirliyinin sifarişi ilə Bakı şəhərində 1 məktəbin, 2 rayonda isə 3 məktəbin tikilib istifadəyə verilməsi nəzərdə tutulub. Məktəblərin texniki vəziyyəti ilə əlaqədar Təhsil Nazirliyinin mütəxəssisləri tərəfindən mütəmadi olaraq monitorinqlər aparılır və tikintisinə və əsaslı təmirə ehtiyacı olan məktəblər Dövlət Proqramına salınır”. 

Nazirlikdən həmçinin qeyd edilib ki, bəzi məktəblərin təmir-tikinti işləri Bakı Şəhər İcra Hakimiyyəti və Rayon İcra Hakimiyyətlərinin sifarişləri ilə aparıldığından hal-hazırda neçə məktəbin tikilməsi və ya əsaslı təmir olunmasını müəyyənləşdirmək üçün həmin orqanlara müraciət olunmalıdır.

Təmir işləri ilə yanaşı məktəblərin dərsliklərlə təmin edilməsi məsələsi mühüm əhəmiyyət kəsb edir. Ötən illərdə də bəzi məktəblərdə dərsliklərin çatışmazlığı problemi yaşanırdı. 

Nazirlik bu məsələyə də münasibət açıqlayıb. Sorğumuza cavab olaraq bildirilib ki, dərsliklərin böyuk bir qismi artıq rayon və şəhər təhsil şöbələrinə çatdırılıb: “Təhsil Nazirliyinin Əsaslı Tikinti və Təchizat İdarəsi tərəfindən dərsliklərin böyuk bir qismi artıq rayon və şəhər təhsil şöbələrinə çatdırılmışdır, qalan dərsliklərin çatdırılması isə 10 sentyabr tarixinədək yekunlaşacaq”.

Qeyd edək ki, Azərbaycan təhsil müəssisələri sentyabrın 15-dən fəaliyyətə başlayacaq.