Sumqayıt şəhərində yerləşən 16 saylı orta ümumtəhsil məktəbində aprel döyüşlərində şəhid olmuş Əbdülməcid Axundovun doğum günü münasibətilə tədbir keçirilib. Məktəbin vətənpərvər müəllim və şagird kollektivi şəhidimizin ruhunu böyük ehtiramla yad ediblər. Əbdülməcid Axundovun müəllimləri, onu tanıyan şagirdlər şəhidimiz haqqında xoş xatirələrini tədbir iştirakçıları ilə bölüşüblər. Əbdülməcidin necə bir vətənpərvər şagird olmasından ağızdolusu danışıblar. Məktəblilər Əbdülməcidin qanını yerdə qoymayacaqlarına, erməni qəsbkarlarından bütün şəhidlərimizin intiqamını alacaqlarına söz veriblər.
Tədbirdə Əbdülməcidin ailə üzvləri ilə yanaşı Qarabağ Əlilləri Cəmiyyətinin üzvləri, Qarabağ qaziləri, Təhsil şöbəsinin məsul işçiləri, Əbdülməcidin komandiri Azər Məmmədov və digər qonaqlar iştirak ediblər. Tədbirdən sonra məktəbin şagird və müəllim kollektivi Şəhidlər Xiyabanına gedərək, Əbdülməcidin, həmçinin orada uyuyan bütün şəhidlərimizin məzarını ziyarət ediblər.
Qeyd edək ki, oktyabrın 15-də Sumqayıt şəhərində aprel şəhidimiz Əbdülməcid Axundovun doğum gününə həsr edilmiş geniş xatirə tədbiri keçiriləcək.
Xəbərdən istifadə edərkən istinad etmək vacibdir.
