Nə qədər qəribə və təəssüf doğuran hal olsa da, Azərbaycanın bəzi rayonlarında heyvan cəsədləri Kür çayına atılır. Zərdab rayonunun Qoruqbağı kənd sakini Fəqan Rəşidov deyir ki, əvvəllər də Kür çayında ölmüş heyvan cəsədlərinə rast gəlinirmiş, ancaq tək-tük hallarda olduğuna görə, əhali buna o qədər də ciddi əhəmiyyət verməzmiş. Lakin son vaxtlar rayonlarda heyvanlar arasında nodulyar dermatit xəstəliyinin yayılması əhalini təşvişə salıb: 

"Kürdə axan heyvan cəsədlərinə tez-tez rast gəlirik. İnsanlar narahatdılar. Hər kəs düşünür ki, birdən Kürə atılmış heyvan cəsədləri məhz həmin xəstəlikdən ölən heyvanlara aid olar. Bildiyiniz kimi, bir çox rayonlarda və Bakıda əhali içməli su kimi məhz Kür suyundan istifadə edir. Odur ki, ölmüş heyvan cəsədlərinin Kürə atılması heç bir halda doğru deyil. Sözün açığı, əvvəllər belə cəsədləri Kür çayında "üzən" görəndə o qədər də narahatlıq keçirmirdik. Axıb gedirdi, amma indi nodulyar dermatit xəstəliyi ilə əlaqədar olaraq təşviş içindəyik. Qorxuruq ki, Kür suyundan həmin xəstəliyin infeksiyası bizə, ailə üzvlərimizə, yaxınlarımıza, uşaqlara keçər".

Fəqan Rəşidov heyvan cəsədlərinin Kür çayına Zərdab rayonu ərazisində atılmadığını söylədi: "Mənə belə gəlir ki, həmin heyvan cəsədləri Kür çayına ətraf rayonlardan atılır. Çünki heyvan cəsədləri su ilə artıq bizim rayona gəlib çatanda iylənmiş olur. Heyvanın cəsədinin iylənməsi isə o deməkdir ki, deməli, uzun müddətdir suda qalıb, ona görə pis qoxu verir. Yeri gəlmişkən deyim ki, bir neçə gün öncə Kür çayında 3 ədəd heyvan cəsədi gördük. Həmin heyvanların cəsədini lentə aldıq. Bir daha deyirik, biz artıq Kür çayının suyunu içməyə qorxuruq”. (modern.az)