Sumqayıtın tanınmış simaları ilə ənənəvi müsahibə rubrikamızı davam etdiririk. Budəfəki qonağımız teleaparıcı və rejissor Elman Telmanoğludur.

 - Elman müəllim, sizi xoş gördük. Bildiyimizə görə, ixtsasca mühəndissiniz. Necə oldu ki, yaradıcılqla məşğul oldunuz?

 - İstedadı olan mühəndis elə yaradıcılıqla məşğul olur. Bütün ixtisaslar sonradan qazanıla bilir yeganə yaradıcılıqdır ki, bunu sənə ALLAH verməsə, mümkün deyil. Yaradıcılıq gərək insanın canında qanında olsun.

- Aparıcı olmaq uşaqlıq arzunuz idi, yoxsa taleyin qisməti?

- Doğrudan da taleyin qisməti - uşaqlıq arzum mühəndis olmaq idi. Uşaq vaxtı məndən kim soruşurdu ki, böyüyəndə kim olmaq istəyirsən, ani cavab verirdim ki, injener. Amma qismət elə gətirdi ki, mən teleaparıcı oldum.

- Öz sənətinizi nə vaxtsa davam etdirmək istərdinizmi?

- Sadə göründüyü qədər çətin sualdır. Ola bilər ki, yenə tale öz sözünü desin, dəqiq deyə bilmirəm. Ola bilər nə vaxtsa…

- Artıq 16 ildir ki, televiziya sahəsində çalışırsınız. Bir müddət öncə “Üçüncü Sektor” İctimai Birliyinin təsis etdiyi diplomla mükafatlandırıldınız. Bu sizin 16 illik fəaliyyətinizə gec verilmiş mükafat deyildimi?

- Bilirsiniz, həyatda gec deyilən bir məhfum yoxdur. Sadəcə qazanmaq, almaq və qalib gəlmək var. Mən isə 2013-cü “Üçüncü Sektor” İctimai Birliyinin təsis etdiyi Televiziyada göstərdiyi peşəkar teleaparıcılıq və rejissorluq fəaliyyətimə görə ilin yaradıcı personası mükafatını aldım.

- Efir məkanına "Bura Bakıdır" verilişi ilə gəldiniz. "Kəndimiz" verilişi ilə tanındınız. “Aramızda qalsın" serialı isə məhşurluğunuzun pik nöqtəsi oldu. Sadaladıqlarımla razısınızmı?

 - Efir məkanına “Bura Bakıdır” verilişi ilə gəlməmişəm. Mən “Bura Bakıdır”dan əvvəl AzTV kanalında, daha sona “Lider” TV-də “Əsgər Salamı” verilişində efirə cıxmışam. Daha sonra “Tezbazar” verilişində aparıcı olmuşam. Amma qalanları ilə razılaşıram.

 - “Aramızda qalsin” serialında çəkilmiş bir obrazın iki aktyor tərəfindən canlandırılması riskli məsələdir. Həyatda həmişə risk etməyi sevirsiniz?

 - Bəli. Məni tanıyan yaxın dostlarım və əhatəmdə olan insanlar bilir ki, mən risk etməyi necə sevirəm, hətta həyatım bahasına olsa belə.

- “Lider” telekanalında Azərbaycanın dilbər guşələrinə aid verilişlər aparırsınız. Nədənsə həmkarınız Rəşad bəylə kəndə gələndə milli xörəklərlə tanışlıq onun payına düşür. Yerinizi dəyişdirmək istərdinizmi?

- Xeyr, sonra mən də birdən Rəşad qədər çəki alaram, yəni kökələrəm (gülür).

- İndiyə qədər gəzdiyiniz hansı kənd sizin həyatınızda unudulmaz izlər buraxıb?

- Bütün bölgələrimiz gözəldir, qonaqpərvərdir, amma Qazağın Cəfərli, Şıxlı kəndləri, bir də Astara rayonunun Sım kəndi yadımdan çıxmaz. Cəfərli kəndi erməni ilə üzbəüz olmasına baxmayaraq, insanlarda həyat eşqi çox yüksəkdir, adam o insanlarla fəxr edir. Şıxlı kəndi cox qonaqpərvərdir. Sım kəndi isə çox ecazkar bir təbiətə malikdir.

- Bir çox seriallara çəkilirsiniz. Sərbəst rejissor kimi özünüzü sınamaq istərdinizmi?

 - Təbii ki, gələcəkdə böyük kino meydanında özümü sınayacağam. Amma boyuk kino meydanında…

- Əgər belə bir ideyanız, varsa bu film hansı mövzunu ekrana gətirəcək?

- Bu insanın həyatla mübarizəsini ekrana gətirəcək. Burda əsas yerdə ən ali hiss olan sevgi hissləri daha cox qabardılacaq. Və sevə bilən insanın həyatda hər uğura imza ata bilməsini göstərəcəm.

- Aktyorun obrazı canlandırması üçün xarici görünüş, fitri istedad, yoxsa qazanılmış səhnə təcrübəsi - bunların hansı daha vacibdir? Bu üç xüsusiyyətdən özünüzdə hansını görürsünüz?

- Aktyor üçün bu sadaladığınız kefiyyətlərin hər biri lazımdır. Amma mən aktyor deyiləm, mühəndisəm. Ona görə bu xüsusiyyətləri özümə şamil edə bilmirəm.

- Elman müəllim, Sumqayıt şəhərində yaşayırsınız. Sumqayıtla bağlı hansı hadisələr xatirəyə çevrilib?

- Demək olar ki, bütün hadisələr xoş və acı xatirələrə çevrilib. Acıları deməyək, amma xoş hadisələr coxdur. Ən xoş hadisələrdən biri - uşaq vaxtı Novruz bayramına hazırlıq yadıma düşür, papaq atmaq, taxta oğurlayub ocaq qalamaq. İndi də dostlarımla arada oturub səmimi söhbətləri xatırlayırıq və onlar xoş xatirələrə çevrilir.

 - Sumqayıt həmişə gənclər şəhəri kimi tanınıb. Sumqayıtın qocalığını necə görürsünüz?

- Sumqayıtın qocalığını elə yenə də cavan Sumqayıt kimi görürəm.

- Vaxtilə Sumqayıtda yayımlanan MOR radiosu haqqında nə fikirləşirsiniz? Onu yenidən canlandımaq olarmı?

- MOR radiosunu hər an bərpa etmək olar. Onu deyə bilərəm ki, orda çox savadlı və ağıllı kadrlar var idi. Yadımda qalanlardan Rüstəm, siz ozünüz Zeynəb xanım...

- Müsahibəyə görə çox sağ olun. İşlərinizdə uğurlar arzu edirəm. Var olun!

- Mən də sizə öz dərin təşəkkürümü bildirirəm və Xeberle.com portalına bol oxucu kütləsi arzu edirəm.

Zeynəb Abdullah
Xeberle.com